نفساني - عرض مشاركة واحدة

08-07-2013, 01:16 AM

رُبما لدي رهاب اجتماعي !

السلام عليكم و رحمة الله و بركاته

كيف حالكم جميعاً ؟

في البدايه حبيت اقول اني ترددت كثير و انا افكر في اني اطرح مشكلتي هنا
و بصراحه الى الان متردده مدري ليه مُمكن لأني اول مره اعترف بهالمشكله و اقولها قدام الملأ

قرأت في المنتدى و ما اخذت مدّه طويله في التجوّل ,
بصراحه تفاجأت و فرحت ان فيه منتدى مُتخصص للطب النفسي !
و فيه شريحه كبيره من الناس يقدرون يطرحون مشاكلهم النفسيه بدون خجل او تردد
حمّستوني و عطيتوني جرعه من الشجاعه و القوّه و الامل اني اتفائل و ادور عن العلاج او الحلول لمُشكلتي

اولا : انا فتاة في مُقتبل العمر ، ادرس و لله الحمد و حياتي طبيعيّه و يغلب عليها الهدووء الشديد
خَجوله و متردده احيانا و حساسه و كتومه و هادئه و يروني صديقاتي بأني بارده ، و عائلتي يشوفوني حاره !

المهم
من فتره اقدر اقول من سنتين او ثلاث بدت تطلع عندي بعض ما ادري ايش تسمونها
مُمكن عادات او تصرفات ، بدايتها اني صرت اتلعثم في الكلام يعني في نص سوالفي مع اللي قدامي
يدخل حرف بالغلط ، او ما اعرف كيف انطق الكلمه ، بعدين تطوّر الوضع و صرت في نص السالفه او النقاش
انسى الكلام اللي قلته فجأه كذا و هالشي جدا محرج و يقلل من قيمة الشخص عند نفسه قبل الآخرين
في البدايه انصدمت من نفسي صرت اتضايق كثيير ..
لما تطور الوضع اكثر و اكثر و صرت حتى مع اختي و امي و ابوي
تقدرون تقولون بدأت ثقتي بنفسي تهتز او ربما الحين تلاشت !
الآن ، صرت ما اتكلم كثير و لا اسولف و ان ضايقني شي اكتفي بالبكاء ، احيانا تمر علي اوقات يجيني ضعف شديد
آحس ان دآخلي بيتقطّع من الآلم ، احس ان مشاعري تؤلمني , تذبحني ، تَحرقني
آحس اني وحيده .. "زيّ الي يعيش في كوكب لحاله مايقدر يكلّم احد ما يقدر يورّي احد اوجاعه"
أسرتني الوحده و الضيقه ، آهملت نفسي و اللي حولي ، صار لا شيء يهمني آبدا ,
حتى لو اجتمعنا مع بنات اقاربي و بدأو يناقشون موضوع او يسولفون في اي شي اتكلم مجاراة للوضع
و عشان ما احد ينظر لي بنظرة السّاكته المُعقده فقط !
صرت ما احس بنكهة الجمعات و السوالف و المواقف اللي تحصل
و في الآونه الاخيره صرت اتهرّب من الجمعات و خصوصا الجمعات اللي بنسأل فيها و بسولف كثير
و السبب لاني صرت ما اقدر اوصّل مشاعري او رأيي او تعبير معين للاشخاص اللي قدامي بالكلام

آخجل جدا من نفسي ، و خصوصا اني احس بسُخف تفكيري احيانا
و اقول لنفسي : اني اكبر و اجمل من ان تكون حالتي كذا
صحيح ربما احقّر من نفسي ان صار موقف و تلعثمت فيه بالكلام او تصرفت تصرف ما يعجبني او مُحرج
لكن التحقير هذا نتيجة اني كنت اظن اني افضل من اني اكون ضعيفه الى هذي الدرجه
و ما عندي القدره في التحكم في نفسي و حركاتي و كلماتي

خُلآصحة الكلام ، رُبما هذا رُهاب اجتماعي !
ابي منكم تنصحوني و توجهوني للطريق الصحيح ,
لأنّي حقاً آبي اطلع من هاذي الحاله و اتصرف بكامل طبيعتي و راحتي
و احب نفسي و اثق فيها و احترمها كما يَجب

و لكُل المارين من هنا بآقآت من الفُل و الياسمين .

المصدر: نفساني