نفساني - عرض مشاركة واحدة

11-07-2013, 05:53 AM

اقتباس:

المشاركة الأصلية كتبت بواسطة أماني القلب

مساء الخير اخي قسورة شكرا لطولة بالك علي عن جد غلبتك معي،بس بحب استشيرك بالادوية لانك من الاردن وبتعرف ادويتنا منا وفينا هههه،والك تجربة بالادوية ونفس الاطباء تقريبا،بارك الله فيك.
اخوي انا لخبطت اخر 4 شهور بالادوية عشان كنت مبلشة ادرج عشان اقطعه فغير لي الدكتور من يونيروكس لبروزاك حبة يوم بعد يوم لمدة شهرين وبعدين اخف حتى اقطعه وخلال تناولي لليونيروكس ماشكيت من الارق نهائي بس بعد استعمالي بروزاك مع انها الجرعة خفيفة ظهرت مشكلة اﻷرق ،ورجعت لليونيروكس ونفس الشي ماخلصت المشكلة،وباخر زيارة للطبيب زي ماحكيت لك حولت للبيرلكس حسب وصفة الطبيب وطلبي عشان اتخلص من زيادة الوزن مع انها مش كتيرة صراحة بس خايفة انصح اكتر هههه،يعني الحمدلله بفضل من الله نوبات الهلع اختفت كثيرا ولكن معاناتي الان من الارق يعني اللي بدي اوصلك اياه انا بالعكس مابدي ازيد جرعة البيرلكس بحاول اخلص منهم بس بالتد يج حتى لا انتكس؟
البراناكس عن جد بكرهه اخدت حبتين اول يوم زي ماحكى لي انس نمت وانا قاعدة ههه مش لهالدرجة السطلان،وضليت اليوم التاني بدي انام،عن جد تعبت مش عارفة شو الحل؟
بجرب الدواء اللي حكيت لي عليه بس اسأل الدكتور وبشوف،زي مابحكي اخواننا الخليجيين شورتك وهداية الله.
بس اخوي البيرلكس رايك بحالتي اﻵن 5 ملغم جيدة مابترجع النوبات بعد علاج سنة و7 اشهر،و 5ملغم بيرلكس متل 5 ملغم يونيروكس،وهل بيرلكس بيسبب ارق؟
ولو ضليت عالبيرلكس لمدة طويلة تمنع النوبات ومافيها ضرر؟
شكرا مرة تانية

مساء النور ‘‘ لخبطة الادوية مو مشكلة و للمعلومة انتي ما عندك مشكلة ارق قوية لانه الارق انواع و بدناش نتطرق لانواع الارق انتي الي فهمته من كلامك انك عندك مشكلة في الدخول في النوم مش مشكلة ارق قوية مثلا انه بعد ما تنامي نومك متقطع و بتصحي اكثر من مرة بالليل بعد النوم و ها شي طبيعي لانك كنتي تاخذي يونيروكس و هو مساعد على النوم بعدين اخذتي بروزاك و هو من الادوية التي تسبب ارق و هذا سبب اختلاف بساعة جسمك البيلوجية و ادى الى تاخير موعد نومك و طبعا الي بساعد كمان في هاي المعادلة انك من الاشخاص الي بحبوا السهر يعني مش من النوع الي بنام الساعة 8 المساء و للمعلومة لو تتعبي بشغل البيت هذا بساعد على النوم كمان لانه من المعروف انه الجهد النهاري يؤدي الى تحسين النوم ليلا بس طبعا الشغل يوميا مش كل كم يوم مشان يتأقلم الجسم على التعب و يتعود على النوم بنفس الوقت ‘‘ نيجي للبيرلكس جرعة 5 مغ بيرلكس لا تعادل جرعة 5 مغ يونيروكس بل بتعادل حوالي جرعة 20 مغ يونيروكس لكن هذا ما بيعني انه جرعة 5 مغ بيرلكس انها ممكن تمنع نوبات الهلع لانها جرعة بسيطة غير علاجية بل هي جرعة صيانة فأذا انتي شاعرة انه لسى في اثر للنوبات لو كان حتى اثر خفيف خلي الدكتور خليل يرفعلك اياه الى 10 مغ بكون افضل بكثير ‘‘ و بيرلكس ما بسبب ارق لكن ما بساعد على النوم يعني دواء محايد مشان هيك ينصح بتناوله صباحا بعد الفطور و في رمضان بعد السحور افضل شي ‘‘ و لو ضليتي على البيرلكس مدة طويلة ما فيها اي ضرر لكن كما اتفقنا سابقا الجرعة بسيطة و ما في ضمان انها تمنع النوبات ‘‘ اما انا باكدلك بعد رب العالمين بجرعة 10 مغ انها بتمنع النوبات بشكل قوي لا نقول قوي جدا لكن قوي بما فيه الكفاية .

و للمعلومة اماني انا خبرتي في الادوية مش عن تجربة بس لانه في كثير ادوية ما جربتها انا و لله الحمد من عشر سنوات و طالع قرأت كتب طب نفسي و ادوية نفسية و استشارات نفسية يمكن اكثر من دكاترة نفسيين فاتحيين عيادات و طبعا بعرف عدة اطباء نفسيين و تناقشت معهم بحالات كثيرة جدا و اخذت من خبرتهم العملية و العلمية و استفدت كثير منهم و بنفس الوقت مر علي مرضى باعداد كبيرة شفت حالاتهم و علاجاتهم و تابعت علاجهم بنفسي و حتى انس بحول علي كثير من المرضى عنده في العيادة مشان يستشيروني في الادوية و الجرعات و بعدللهم الجرعات و الادوية و بقلهم روحوا عند الدكتور خليل خلي يشوف اذا التعديل هذا بناسبكم و الا لاء و طبعا عندي مرضى لليوم متابعهم هاتفيا و وجهه لوجه في عيادة الدكتور خليل و لما يشتكي مريض من اشي و انا قاعد مع انس انس بستشيرني شو نعطيه و انا بقله العلاج و الجرعة و بكتبلوا اياه زي ما وصفتله اياه بالضبط ‘‘ و انس نفسه انا هاليومين بدي اعطيه مثبت مزاج بجرعة علاجية منيحة و مضاد ذهان مشان الهوس الي عنده و بدي اعطيه كمان ست جلسات كهرباء مشان يعقل شوي لانه معجوق زيادة عن اللزوم هههههههههههه ‘‘ طبعا النبذة هاي مش مشان استعرض عضلاتي في عالم الطب النفسي و الادوية النفسية ‘‘ بس مشان اذا حدا لاحظ اني بحكي بالادوية و الجرعات دايما يعرف اني بحكي عن علم و ليس عن جهل او تجربة فقط .

عفوا يا ستي و لا شكر على واجب اي استفسار انا في الخدامة ست اماني لا تترددي .