بسم الله الرحمن الرحيم
انا اسمي احمد. عندي 23 سنه. طالب في كليه الطب البيطري جامعه الاسكندريه.
قبل حوالي سنتين روحت لدكتور نفسي اشكو من الاعراض التاليه ..
شعور كان هناك شخص داخل راسي بيراقب افكاري و يعلق علي تصرفاتي.
عدم القدره علي التركيز لان عقلي كان بيكون كانه مقسوم.
نوبات فزع حصلتلي اثناء امتحانات الثانوي و بتحصلي في المواقف الجديده و في الاماكن الغريبه فيزداد نبض قلبي و بتعرق بشده و بكون مدهوش و مهتز.
الدكتور سألني كذا سؤال مش فاكر منهم غير واحد " انت بتسمع صدي صوتك و انت بتفكر ؟ " قولتله ايوه علي اساس ان ده شئ طبيعي مش كل الناس بتسمع صوت نفسها و هي بتفكر ؟
فكتبلي علي العلاج الاتي ..
ابيليفاي
اندرال
مشيت علي العلاج ده فتره و الحمد لله اختفت معظم الاعراض علي الرغم من انه كان فيه اعراض جانبيه في البدايه
الي حصل بعد كده ان الدكتور و مع كل شكوه جديده مني كان بيغير العلاج الثاني غير الابليفاي الي هو فضل ثابت فمثلا انا اخدت zyprexa و risperdal و الخ
و برده اخدت ادويه ثانيه غير الانتي سيكوتك بس مش فاكرها.
حاليا انا ماشي علي ابيليفاي 15 و كوجينتول و سيردوليكت.
طيب فين المشكله ؟ المشكله انه بقي عندي اعراض ثانيه و كاني خرجت من دوامه و دخلت دوامه جديده. لكن انا مفضلتش ساكت انا اشتكيت للدكتور لكن من غير فايده. فكلها محاولات بائت بالفشل. و الصراحه انا اتقفلت منه في اخر مره روحتله. قولتله علي ان سقطت و ععيد السنه فما كان منه الا ان قال كثر خيرك ! طبعا حاجه تنرفز لاني كنت بتحايل عليه يساعدني في موضوع تركيزي الضارب ايام الامتحانات فاداني ابيكسيا و مكنش منه اي فايده ..
و المشاكل الي عندي دلوقتي ( غالبا كانت عندي من الاول بس مشاكل اكبر كانت مغطياها) و انا مرتبها حسب الاولويه يعني من الحاجه الي مهم انها تتعالج حالا الي الحاجات الي ممكن اصبر عليها ..
المذاكره .. عندي مشكله غريبه فبعد ما بعد اذاكر فترات طويله بجي بعد شويه اسمع الحاجه الي ذاكرتها يكون ادائي سئ جدا و كان قريتهم في السريع مش قعدت اكتب و اعمل .. الغريب اني حاسس اني بتعمد اني انسي نفسي المعلومه يعني بتبقي حاجه لسه قريها و في نفس اللحظه بنساها مع انها بتبقي علي لساني لكن دماغي بتتجمد و بصد المعلومه عن انها تظهر .. فانا بعاني من ضعف في التركيز و عدم القدره علي الاحتفاظ بالمعلومات ..
انا شخص قلوق جدا لدرجه اني قلقي النفسي انعكس علي جسديا الي مشاكل جلديه .. انا نفسي اني اهدي و استرخي و اعيش الحياه بساطه .. الموضوع بالنسبه لي اصعب مما يبدو .. انا دايما مشدود و متوتر و علي اعصابي الي قربت تتحرق خلاص ..
لما اكون في مكان عام و في ناس حولي بحس ان كل نظرات الناس ده موجه لي و كانهم بيرقبوا كل حركه بقوم بيها و مستنين اي غلطه مني عشان يتريقوا علي ..
عايز اهرب من اشياء كثيره .. من حضور المحاضره او السكشن لان الدكتور الي فيهم بيسأل او من اني اروح اشتري حاجه و اضطر اني اواجه شخص غريب .. يعني اهرب و استخبي في مكان امن بعيدا عن المواجهه
انا فعلا عندي اعتقاد اني بحارب نفسي .. لاني لما بحاول اعمل شئ كويس لي بلاقي جسمي بيحاربني .. مثلا بحاول اني اهدي و اركز الاقي شعور غريب ينشأ في عيني اليسري .. و كانه تواجد لصرف انتباهي و تشتيت تركيزي .. و الموضوع اكيد نفسي لانه مبيحصلشي الا وقت المذاكره او التفكير في موضوع مهم ..
عندي شعور بالتقزز من اشياء كالطعام و الاشياء الدهنيه و الفضلات .. فمثلا تلاقيني بمسك الاكل بطراطيف صوابعي و بعد الاكل بتاكد اني غسلت ايدي كويس جدا عشان اضيع المواد الدهنيه و الريحه ..
احيانا و انا بصلي بشك اني صليت اربع ركعات او ثلاثه .. فمبكنشي مركز مش عارف و لا موسوس و لا ايه ؟