السلام عليكم

انا تعبت من وضعي عندي مشاكل نفسية وابغى حلول لها
انا الحين طالب في السنة التحضيرية وعمري 18 سنة

كنت طبيعي ومافيني شي، لكن يوم صرت بثاني ثانوي فجأة صار يجيني خمول شدييييييييييييييييييييييد جدا وقوي لدرجة اني انام زين بس ابقى خملان سواء نمت او لا
طول حياتي خملان وتعبان واحيان يشتد كثير وهذا اثر على دراستي صرت معد اقدر ادرس ولا اسوي اي عمل اتعب بسرعة، والكل من الاهل والاصدقاء والمدرسين في المدرسة
لاحظوا علي الخمول الشديد هذا وبعدها رحنا المستشفى وفحصت وطلع كل شي تمام وماعندي مشاكل وقالي الدكتور سوي رياضة وتروح انت مافيك شي يمكن لانك ماتمارس الرياضة وكذا

وكان يجيني حالات ارق يعني خصوصا في العطل، عطلة العيد او عطلة المنتصف يجيني يوم اواصله كامل مايجيني النوم بدون سبب لكن الارق مو شديد عادي يوم وكذا وبعدها انام
وكان يجي شديد ومقدر انام يوم سافروا اهلي بالاجازة وبقيت انا واخوي بس بالبيت جلست الاجازة كلها مايجيني النوم وارق مدري ليش،لكن اول ما ارجعوا من السفر راح وصرت انام زي قبل

ويوم انتهت سنة ثاني ثانوي بالاجازة الصيفية بدا يجيني شي احس اني تعبان وكأن فيني حمى وحرارة هذا الشعور يجيني كان اذا جا فيني حمى وحرارة او مرض
يعني شعور مدري كيف احس اني ثقيل وكأن فيني حرارة بس قست الحرارة ومافيني شي قعد فيني كم يوم ببداية العطلة ثم راح وبعده بكم يوم بالعطلة فجأة جاني الارق
ببدايته صرت اتعذب مع النوم ومايجيني بسهولة لكني كنت انام بعدها اشتد علي صرت معد انام ومدري وش السبب وصار يجيني بكاء مكتوم بدون سبب واحس اني مقدر اطلعه كامل ومدري ليش
وخفت وكان ذاك الوقت قريت رسالة يقولون فيها فيه واحد صيني سهر ومات بسبب السهر وقلة النوم
وخفت زيادة واشتد علي القلق واحسب الواحد يموت ومدري ايش انا خفت لان حالقة الارق اصابتني قبل لا اسمع بشي زي كذا فخفت قلت وش فيني ما انام وصرت اشيل هم النوم واقول دايم بنام اليوم او لا وتنكدت حياتي
حتى لدرجة احيان وصل فيني الارق ما انام يومين وكان يجيني اعراض زي صعوبة في البلع وزيادة ضربات القلب وحسيت اني بموت لاني كنت خايف مرة لكن قريت في النت طلع مرض اسمه القلق النفسي العام في ويكيبيديا
ويوم دريت انه مرض نفسي ومجرد وهم وماني ميت خف عني الخوف وراحت صعوبة البلع والخوف وكذا لكن لسى الارق مستمر

تعذبت سنة كاملة ثالث ثانوي كلها والارق فيني والقلق بجسمي مايروح ابد عند صدري قلق شديد وبدون سبب مدري ليش،وكان يروح احيان اسبوع بعد كل فترة شهور طويلة ثم يرجع هو والارق
واهلي كانوا يقولون لي انت لانك تفكر ، قلت لهم ما افكر ولا شي مدري يجي من نفسه ، لكني حاولت اطلع سبب بالتفكير مع اني ما اعتقد انه هو
لكن بقوله قبل لاتجيني حالة الارق هذي كنت اقرا عن الكليات العسكرية واشوف مقاطع عنها وكيف وعن الجامعات وبعض التخصصات كنت اقرا عادي للفائدة عشان اعرف وجهتي بعد الثانوي
وماكنت شايل هم يعني توني بثاني ثانوي وعادي وما اعتقد انه السبب لكن قلت اقوله يمكن هو وانا مدري لان مافيه غيره اتوقعه السبب

وصرت اقرا بالنت وشفت ناس كانوا يعانون مثلي ويردون عليهم ناس بالموضوع ويقولون قل انا انام زي الناس عادي ومثل هالكلام
فصرت اوسوس قهري بهالكلام كل يوم معد صرت اقدر اركز مع المدرسين ومع الناس صار في عقلي اوسوس واقول انا انام ويجيني النوم كله عشان يجيني كنت احسب ان هالطريقة هي الي تخليني انام او شي
بس ماتنفع، بعدين بعد فترة صرت اقرا بالنت وقريت ناس يقولون عشان التفكير وكذا فصرت اوسوس قهري بالجامعة والكلية العسكرية وافكر كيف بدرس فيها وين بنقبل ومدى صعوبتها ومن هالكلام
صرت اوسوس قهري فيها لاني اظن انها هي الي ماتخليني انام وصرت احلل واقول هي عادي وتنقل في كذا وتدرس كذا وتصير كذا ومعد صرت اقدر اركز مع المدرسين لازم كل شوي اوسوس واقول لنفسي كذا في عقلي
لاني اظن ان كذا هو الي بيعالجني ويخليني انام، بس حتى الهموم وكذا ماتخلي الواحد للدرجة ذي يقلق ماينام ابد طول عمره،

وكان يجيني ارهاق ومقدر اتحمل الصعوبات والكرف وكذا، وكان يجيني زي تشويش بالرؤية احيان كل فترة
وبعدها يوم طوّل الامر معي بفترة كنت بالنادي اتمرن وجتني دوخة قوية مرة لدرجة اني بكيت منها ورحت المستشفى وفحصت وقالوا مافيك شي ابد
لكن الدوخة ماكانت وهم كانت قوية مرة وجتني مثلها بعدها باسبوع قوية مرتين وبعدها ماصارت تجيني القوية مرة بس تجيني الدوخة والدوار ولازالت مستمرة معي
واحيان تقوى واحيان اخف واحيان ماتكون فيه وصرات بعد الدوخة احس الحياة كرف وارهاق وجسمي طول الوقت مرهق وقلق واحس الحياة كرف وكل شي دراسي وفيه كرف شديد اقول وش الكرف ذا ومقدر اتحمل شي
وصرات ارحم اي واحد واقول مسكين وكذا صارت فيني شوية رقة قبل ماكنت كذا يعني انا انسان طيب بس ماكنت احس ان اي انسان تصير له مشكلة بشي وكذا مسكين وارحمه لا عادي الوضع

وبعدين بالعطلة الصيفية صار يجيني وسواس قهري بافكار انا مبيها بس تجيني غصب زي اني احسد نفسي او واحد من اهلي ثم ارجع اذكر الله وغيرها من الافكار
وماكنت ادري انه مرض واسمه وسواس قهري قريت عنه بالصدفة بالنت ودريت انه مرض، وفجأة بالعطلة هذي جاني خوف من العمى وصرت اخاف من الامراض النفسية والعضوية اذا قالوا هذا فيه مرض كذا
مدري ليش جا قبل كنت عادي وما اخاف لكن حاليا راح الخوف من العمى لكن ما انكر انه باقي شوية خوف ببعض الامراض النفسية والعضوية الاخرى ، وكان يجيني شي زي وجهي وراسي يتحرك من نفسه
كانت تجيني على خفيف قبل النوم برمضان بكم يوم كذا ثم راحت

ويوم فحصت الدوخة فحصوا عندي الفيتامينات ولقوا عندي نقص شدييييييييييييييد في فيتامين "د" كان عندي نسبته حول الـ 3
واخوي قبل كان يقولي فيتامين د يسبب الارق وانه هو قرا في النت عن هالشي طبعا هذا قبل لا افحص انا وقبل لاادري ان عندي هذا النقص
وبعدها يوم فحصت عطاني الدكتور العلاج ومن اول حبة فيتامين د شربتها ، راح الارق بالكامل وصرت طبيعي من ناحية النوم وراح القلق الي ماسك صدري طول ذيك الشهور
لكن الدوخة مازالت موجودة والتشويش ، واستمريت على العلاج لين ما انهيته والحين صار عندي الفيتامين 15

وبعد ما انتهت العطلة واقترب دوام جامعتي باسبوع في يوم حلمت حلم طويل من احداثه انه كان فيه ناس وانا راحمهم مرة وقالي واحد بالحلم انت ترحمهم لانك مريض نفسي
وبعدها قمت وجاني شي زي الخوف لكن كملت نومتي ويوم قمت بقى الشعور الي زي الخوف نفسه ومعه شعور كأني بفقد عقلي احس مخي بيطلع من مكانه واني بنجن
ويجيني هذا الشي في صدري وكذا وكأنه يطفي ويولع وعلمت اهلي وقالت امي هذا اكتئاب لأن امي مصابة بمرض الاكتئاب وقالوا اقرا سورة البقرة استمريت عليها بس ماينفع لكني ظليت استمر ومع الايام
راح الشي الي يجيني زي بصدري كذا الي زي الخوف معرف اوصفه وصار يجيني شي شعور ثاني مدري كيف احس عقلي مدري وش فيه كني بفقد عقلي ، فيه شي مضايقني
وبعدها استمريت بالبقرة وداومت بالجامعة وراح الشي القوي هذا الي احس اني بفقد عقلي، لكن صار يجيني شي زي البكاء كذا في حلقي وصدري وصار يجيني بكاء
واحيان بيوم ثاني مثلاً يجيني شي احس اني ماني مع الدنيا واني بفقد عقلي بشعور مختلف غير الشعور الأوّل، وبعدين كان يجيني خوف اول ماجتني الحالة خفت ان هذا جنون عقلي او مرض جنون اسمه فصام
فصرت اخاف لايكون فصام او جنون، وصرت اوسوس واردد في نفسي مافيك شي وماراح تنجن ومن هالكلام وصرت اوسوس قهري بفصام وجنون ، ولحد الحين والحالة مستمرة معي
واحيان احس اني ماني مع الدنيا مدري كيف وماصرت استمتع زي قبل يعني استمتع بس مو زي قبل فيه شي
وهاليومين صارت تجيني افكالا سلبية زي انا كيف صرت انا ليش انا الي احس بنفسي وبالالم ليش انا مو فلان ليش هو مايحس انا من بين كل الناس اشوفهم كلهم وما اشوف نفسي
او مليت من نفسي افكار زي كذا ويجيني افكار زي حياتك هي كل شيء بالنسبة لك لو تموت او تختفي بيختفي كل شيء بالنسبة لك وكلام زي كذا ، وطبعا اقنع نفسي فيها ايجابيا وقدرت اقتنع لكنها تزعجني
وهاليومين بعد صارت تجيني وساوس قهرية زي انت في وهم الحياة وهم وحلم وزي كذا لكنها خفيفة وتجاهلتها طبعا وماني مقتنع فيها ابدا والحمد لله راحت وماتجي
عكس ذيك ولكن الحمد لله الوسواس القهري بشكل عام صاير خفيف علي مو مثل اول مرة جاني يوم القلق وايام الكلية والجامعة كان متوسط او شديد شوي


ابغى اعيش زي الناس واستانس بحياتي وعمري والله تعبت حتى النادي ماني قادر اتمرن فيه زي قبل من الدوخة تجيني
تكفون حياتي من ذاك الوقت لحد الحين خصوصا صارت جحيم وبديت افشل دراسيا بسبب هالمشاكل ابي حل والله اني خايف مرة انه مرض نفسي خطير
وايش السبب ليش جاني فجأة كذا بدون سبب هو وهذي الافكار

تكفون الله يجزاكم الجنة ساعدوني ابي حل وش هي مشكلتي ووش علاجها ؟

المصدر: نفساني