السلام عليكم

ياجماعة انا كانت عندي مشاكل نفسية طرَحتُها في هذا الموضوع :
http://nafsany.cc/vb/showthread.php?t=90575

وردوا علي الإخوة جزاهم الله خير
وبالاخير انا ماشربت الدواء النفسي الي وصفه لي الدكتور رعد ، شريته وترددت فيه الاهل قالوا خطر وخليته
واكتشفت ان فيتامين د يسبب اكتئاب وقلق وبالفعل عالجته وخرجت بالشمس باوقات كثيرة والحمد لله لي اسبوع شفيت بنسبة 90%

لكن امس جا خبر وحدة من جماعتنا ماتت بسبب حادث اول ماقالوا لي الخبر جاني شي مدري يعني خوف من الحوادث وزي كذا
وكنت اول ماقالوا لي رايح للجامعة والجامعة بعيدة ولازم اقطع الدايري والمخارج وعدة طرق وزحمات وبكل الطريق وانا موسوس لا اموت او اصدم او شي
وجاني خوف شوي وكتمة نفس خفيفة كذا والله شوي وبغيت اضرب فلشر بنص الطريق مدري وش فيني وسوست المهم كملت الطريق ورحت جامعتي وداومت
وبعدها رجعت وبطريق الرجعة نفس الوسوسة خفيفة وتجاهلتها واسرعت بالطريق لين وصلت البيت بسلام ولله الحمد

وبكرة الي هو اليوم طول الوقت فيني الوسوسة هذي ياويلي لايصيبني رهاب قياة السيارة ( رغم اني اسوق من زمان وسواقت زينة ولا فيه اي مشاكل او اي خوف لكن مدري من وين جت الوسوسة )
ولا انهار او ادوخ وانا اسوق ومن الوسوسة كل شوي اقول مافيني شي لاتوسوس ومن الوسوسة قمت طلعت بالسيارة ورحت اسوق عشان ابرهن لنفسي اني ماراح انهار او شي وانه مافيه شي
ومافيه غير الخير ورحت طريق خريص وطبعا نفس وسوسة امس بالقيادة لكن رجعت بسلام ولله الحمد وهي تجي بالاغلب في الطرق المزدحمة والطويلة مثل الدايري وطريق خريص وغيرها

المهم هذا حصل اليوم بالعصر تقريبا لكن بالليل الساعة 10 كذا خالتي قالت لامي ان قريبتنا الي سوت حادث بينت التحاليل انها ماتت من الخوف والصدمة يوم صار الحادث ولا مافيها شي
وزوجها نجا ولم يمت هو وولده ولله الحمد ، لكن هي ماتت من هذا السبب
وانا سألت الاهل طيب كيف الخوف يموت بالفعل ورد علي الوالد وشرح نعم يصير تصلب شرايين وتوقف دم ومن هالكلمات وانا ماخليته يكمل شرح مدري وش جا فيني
جتني اتوقع نوبة هلع شي قوي خوف قوي خفت وقمت تجاهلته احاول انسي نفسي الفكرة والموضوع
المهم حتى وانا قاطع الفكرة موجود ع خفيف ويقوى الخوف والوسوسة ملازمتني والله خايف

المهم انا قبل بالاختبارات النهائية باختبار الحاسب بالجامعة كنت اختبر وفجأة تخيلت اني اطعن نفسي كنت افكر باكتئابي واقول هو لو تطور يؤدي للانتحار ومن هالكلام
المهم مدري من وين جت الفكرة جت فجأة تخيلت اني اطعن نفسي وتخيلت الموت وهو يحدث وشعوره وان الامر حدث بالفعل وبعدها جاء خوف شديد صرت اشوف الدنيا غير واضحة مع ضخ واضح بالدم بجسمي وخوف شديد وعيا يروح
قلت خلاص والله في نفسي طز بالاختبار وبمستقبلي كله اهم شي العافية ما ادور غيرها وعيا يروح الا لين تنفست نفس عميق وطلعته وراح هذا الشعور وبعدين معد افكر فيه ولعد اتخيل الموت ولعد تخيل الفكرة

المهم بعد سالفة قريبتنا هذي وانها ماتت من الخوف صار فجأة اول ماقالوها لي جاني خوف زي ذاك الخوف وزي ذاك الشعور الي صار بالاختبار
واقوى حيث انه مستمر اكثر والفكرة والوسوسة تلح مزعجتني اكثر حيث اني اتنفس بعمق وللاسف مايروح بس خف شوية بس احس فيه الم بجسمي من شدة افراز الادرينالين
واحس بارتجاف وتعب وارتعاش وتعرق ويجيني شعور اتخيل فيه شعور هذه المرأة الله يرحمها يوم جاها الخوف وانه سبب لها الموت لهذا السبب ويجيني نفس ذاك الخوف واقوى واحاول اتجاهله واقطع التفكير

والله تعبت مع ان هذا الشي صار لي اليوم للتو قبل 4 ساعات تقريبًا من علموني الخبر

والله بعدها ابد ماني مرتاح حياتي جحيم وخايف والله تمنيت لو اني مانولدت في الحياة
الله يخليكم الله يعطيكم الجنة ابغى حل وعلاج للمشكلة والله اني تعبان جدا واكتب المشكلة ويديني ترتجف وخايف

والله خايف مرة

هل بالفعل الخوف يسبب الموت خايف اموت او يصير لي شي تكفون
ليت امي وابوي ماقالوا عنها والله خايف

ابغى علاج غير دوائي لان الدوائي ماراح يفيد وخطر هو بس مسكن هل الخوف يسبب الموت ارجوكم ؟

المصدر: نفساني