نفساني - عرض مشاركة واحدة

07-02-2014, 09:01 AM

اولا السلام عليكم , ثانيا ابيك تسامحيني لاني دخلت على مشاركاتك وفطست ضحك على شطحاتك خشم فار ومدري وشو ههههههههه من جد شر البليه ما يضحك بس امانه سامحيني ههههههههه يااا الهي
المهم يا اختاه انا شفت كلمه ساعدوني صدفه وقلت بشوف وش السالفه ودخلت وحسيت اني لازم اعرف اكثر عن الموضوع ودخلت على مشاركاتك واكلك للحرمل وجلوسك في الحمامات مع الروائح الجميله ههههههههههه (الله يجزاك خير خليتيني اضحك كثير وباذن الله لك اجر لانك تسعدين ناس وانتي ما تدرين) المهم فهمت اللي تعانين منه يا اختاه وادري انك في هم كبير وبلاء عظيم الله يخارجك من اللي انتي فيه
مشكلتك لها حلول ان شاء الله لكن يبي لها وقت تعب شوي ونصيحتي لك , عدة امور اولها للاحتياط فقط ابدأي بالرقيه اشتري لك مويه زمزم اكثر من جالون و حاولي ما تشربين الا زمزم قد ما تقدرين واذا جيتي تشربين حاولي تخلينها اذا قدرتي 3 دفعات -تقولين بسم الله وتشربين وتقولين الحمدلله وترتاحين كم ثانيه وتقولين بسم الله وتشربين وتقولين الحمدلله 3 مرات واذا خلصتي قولي الدعاء اللي تبينه مثلا اللهم اشفني من الرهاب شفاءا كاملا ,اللهم زدني علما
ادعي باللي تتمنينه,الشي الثاني (يمكن كلامي يطول شوي بس تحملي) , اشتري لك زيت حبه سودا تلقينه عند العطار واشتري زيت زيتون كوبوليفيا لاني اعتبره من افضل الزيوت , حطي شوي من زيت الحبه السودا و زيت الزيتون في قدر صغير وسخنيها شوي(واذا مافيك حيل تسخنينه لا تسخنينه, بس ترا فيه متعه والزيت دافي يجي على الجسم) واقري فيها الفاتحه اول سوره البقره و ايه الكرسي واخر سوره البقره و اول سوره غافر و اخر سوره الحشر والمعوذات ,(طبعا اقري اللي تقدرين عليه لا تضغطين على نفسك)وبعدها دهني جسمك
اذا فيك حيل تدهنين جسمك كله فهذا كويس (طبعا اذا دهنتي جسمك كله حاولي ما تدهنين اخمص القدم او باطن القدم لان يُقال ان كذا افضل) واذا ما تقدرين تدهنين جسمك كله دهني صدرك وظهرك وبطنك ورقبتك وجبهتك,خلي عندك ملابس خاصه للدهان.
وايضا اذا قدرتي تروحين لراقي فهذا كويس بعد بس لا تروحين لراقي يرقي رقيه جماعيه , الافضل ان تكون الرقيه خاصه يعني لحالك ويكون معك ابوك ولا اخوك,الدهان خليه عليك فتره يعني اقل شي خمس ساعات او اربع , وبعدها اذا تبين تتروشين تروشي.
طبعا استمري على هذا الشي 10 او 20 او 30 يوم , اذا حسيتي انك كسلانه تقدرين تخلينه كل يومين او 3 يعني لا تضغطين على نفسك,هذا من جانب القران , الجانب الاخر وهو فيه شي اسمه علاج سلوكي وهي تمارين او تطبيقات تعلمك اياها الاخصائيه وطبعا هذا الجانب مهم جدا جدا وهو الجانب الرئيسي لمشكلتك بعد القران و الرقيه,
طبعا اهلك مثل ما قلتي يمكن رافضين هالفكره من ناحيه ادويه نفسيه وانها راح تضرك , اولا اشرحي لهم في البدايه ان فيه علاج اسمه سلوكي تمارين تساعدك على انك تصيرين شجاعه و تواجهين الامور بقوه وثقه , والعيادات النفسيه فيها اخصائيات شاطرات و كثير من المرضى شفاهم الله بدون ادويه عن طريق الجلسات السلوكيه (يعني كأنك رايحه نادي وتتدربين عشان تصيرين قويه)
اذا ما نفع مع اهلك حاولي تبحثين في النت وخليهم يتفرجون على العلاج السلوكي ويتفرجون على مواضيع عن الرهاب وانه يعتبر مرض و ان له علاج بالتدريب(حاولي ما تجيبين لهم سالفه الادويه) و ان شاء الله يقتنعون ويفهمون المعاناه اللي انتي فيها , واذا قدرتي تتواصلين مع اخصائيه وتفهمينها الموضوع عشان تشرح الموضوع لاهلك فهذا شي جميل.
طبعا كل شي يحتاج شوي جهد و وقت يعني اكيد ما فيه شي بيجي بسهوله يحتاج منك شوي جهد وعمل ومثابره وراح باذن الله تتخطين كل شي صعب .
الاخير وهو اذا جربتي الامور اللي فوق وما ضبطت معك ساعتها ما بقى الا العلاج الدوائي مع اني اتمنى تطبيبين بدون علاج دوائي , طبعا العلاج الدوائي كويس وكثيرين تحسنوا وصاروا تمام بس طبعا لازم تفهمين امور في العلاج الدوائي عشان تكون الامور واضحه عندك
اولا العلاج الدوائي لازم له اعراض جانبيه خلال الايام الاولى ويمكن تكون 4 ايام او اسبوع او اسبوعين بيكون فيه تعب مع العلاج ويختلف هالتعب من شخص لشخص على حسب طبيعه الجسم , طبعا بعدها الجسم بيتعود عليه وبيصير الوضع بعدها عادي تقريبا الين يجيك مفعول العلاج وتبدا تظهر الحماسه وعدم الخوف (طبعا احتمال يجي مفعول العلاج واحتمال لا لان يمكن جسمك ما يناسبه العلاج ف يضطر الدكتور يوصف لك علاج ثاني)
ثانيا التوقف عن استخدام العلاج لها اعراض انسحابيه احيانا تكون خفيفه واحيانا وسط واحيانا شديده وبعضهم يتوهق ما يدري كيف يترك العلاج حتى ولو بالتدريج بيكون فيه تعب و اذا مثلا خلاص وقف العلاج وتخلص الجسم منه بعضهم ترجع له اعراض المرض ويقول ليتني ما وقفت عن العلاج ويبدا يرجع ياخذ العلاج مره ثانيه ويعاني من جديد من اعراض التعب لاستخدام العلاج...الخ
عشان كذا انصح اللي ياخذ علاج خلاص يستمر عليه للابد , طبعا كثير من الدكاتره او كل الدكاتره يقولون ان الادويه النفسيه ما تسبب ادمان , لكن برايي الخاص ان صح عليهم ما تسبب ادمان مثل الهروين و الكوكائين كل شوي ازود الجرعه عشان احس اني في عالم ثاني , لكن انا اشوف ان الادويه النفسيه تسبب ادمان من نوع ثاني غير ادمان الهروين ومشتقاته, هذا له نوع في الادمان وهذا له نوع في الادمان
لكن اكيد ان الهروين مضر كثير ولا منه فايده اما الادويه النفسيه لها فايده اكيد بس في نظري لها سلبيات والسلبيات هذي احيانا تكون خفيفه واحيانا تكون اقوى من المرض نفسه , يعني تخيلي ماده تدخل الجسم ويتعود عليها وتكون في الدم شهور واحيانا سنوات اكيد خلاص الجسم ما يستغني عنها وحتى لو ترك هذي الادويه لازم يكون فيه تعب وطبعا يختلف التعب من شخص لشخص ويختلف حسب المده وحسب قوه العلاج او جرعه العلاج.

ان شاء الله اكون افدتك وبالنسبه للدراسه الحياه قدامك ولو فاتك شي او فشلتي في شي او رسبتي , لا تيأسين الفرص قدامك كثيره ان شاء الله وراح تنجحين باذن الله وتتخطين العوائق اللي انتي فيها

طبقي الامور اللي فوق قد ما تقدرين وبالنسبه للحل حق الادويه حاولي ما تلتفتين له الا اذا تقطعت بك السبل وطبعا (لازم ومهم )استخيري رب العالمين مرتين وثلاث و شاوري الاخصائيه , والله يوفقك ويشفيك ويفرج همك وكل من يعاني من المسلمين.