|
تجربتي وشفائي بالكامل من نوبة الهلع
السلام عليكم ورحمة الله وبركاته ...
أكملت سنة على شفائي الحمد لله من نوبة الهلع وبالرغم من أني أخذت على نفسي عهد أني أطوي هذه الصفحة من حياتي ولا أتذكرها حتى لا أعيد الذكريات إلا أني رأيت من واجبي أكتب هذا الموضوع لأني أحس تماما بما تشعرون به . طبعا سأختصر جدا جدا ..
حأكتب رؤوس أقلام مبعثرة جدا لأن مافيا أفكر وأرتب :) .
- عانيت كثيرا في التشخيص حيث استغرقت قرابة 4 سنوات اول ثلاث سنوات نصف كانت فجأة تحدث وأن مسافر وكنت أحسبه مرض وأصحابي كانوا يقولوا اشبك فجأة كنت زي الحصان تلعب كورة وفجأة تعبت وشككوني في مناعتي سويت تحاليل كثيرة لدرجة آخر دكتور قلي يبني إنت صحتك طيبة جدا بل أفضل من الناس العادية لأن ماعندك نقص فأي فيتامين . طبعا تجاهلته ورحت لغيره وهكذا تأكدت النتيجة .
- بعدين المرحلة العنيفة جدا حيث سقطت اثر نوبة عنيفة جدا رحت للمستشفى وهديت هناك ورجعت وأصبحت تتكرر كثيرا بإختصار وصلت لخمس إلى سبع مرات في اليوم جهازي العصبي ارهق تماما لا أخرج من البيت نهائيا سحبت ترم من الجامعة الدنيا سارت سودة لأن ماني عارف ايش القصة وطبعا كل هذا كان حينحل لو كان للطبيب فكرة عن نوبة الهلع .
- الشئ المؤثر هو مسيرتي الجامعية أكثر مايؤرقني كيف حسيب الدراسة وانا متفوق جدا ومن الأوائل على دفعتي .
- في النهاية قابلت طبيب قلي انت شكلك قلقان طبعا ماستوعبت تماما ايش يقصد قلي شوف جرب طبيب نفسي .
- رجعت النت وبحث كثيرا بأعراض القلق وكنت أجهل تماما إنها ممكن تكون أعراض جسدية وقتها تيقنت تماما انها نوبة هلع وقرأت كثيرا جدا عنها .
- على الرغم من انها مستمرة إلى أن هم كبير انازح الحمد لله عرفت ايش فيا حتى لو صعب علاجه اهم شئ انا عارف المرض .
-طبعا جلست اسمع في اليوتيوب على نصائح ومقاطع استرخاء اجنبية وعربية فادتني بس وقت النوبة ماحولك احد :)
- طبعا الجميع يسمع لا تخاف وتدارك الموقف وخذ نفس ومن ذا الكلام لكن عمره ماراح يستفيد إلا إذا وصل لقناعة داخلية عميقة انه يقدر يتحكم بنفسه .
- طبعا الفترة السابقة وقفت سفر حتى زواج صاحبي مارحته والكثير سار يقولوا ايشبك تتغلى وسحبت علينا واهلي يقولوا ايشبك سرت ماتخرج وانا كاتم سري مع نفسي .
- أفضل شي سويته ان عمري ماقلت لحد ان عندي نوبة هلع ابدا وهذا الشئ صعب جدا جدا جدا جدا أكثر شئ صعب مر عليا أكثر من المرض نفسه .
- أمي تقول يالله وديني الزواج ما أعرف ايش أرد الوالد يقول يالله بنروح المدينة معاك نفسي ضاقت عليا مع اني بار بيهم الا ان ذيك الفترة احس اهلي كرهوني من كثر ما اتعذر عن المشاوير وتسمع من كلام انت مافيك خير .... الخ الي يكون اصعب من المرض نفسه لكن عمري ماحرضى لأهلي ينظروا لي بنظرة والله مسكين يحزن !! هذا أكره شئ في نفسي حتى لو كنت مظلوم أكره أسير ضعيف وأتمسكن وأشكي مشاكلي لغيري .
- طبعا لما حذفت الترم ماقلت لأهلي وكنت اخرج بالشنطة :) وفيها ملابس للنادي اجلس في النادي وبعدها افطر واتفرج على فلم على اللابتوب وارجع .
- مر ترم كامل زي كذا وقرب الترم الثاني وتزايد الخوف هل راح اضيع ترم ثاني ؟! لا مستحيل طيب ما أقدر أسوق مسافة طويلة لين الجامعة ايش راح اسوي ؟! وكلتها على الله وسجلت ترم جديد
- باقي يومين على الترم وانا ما اقدر اسوق بدون نوبة هلع حسيت ان الأمر مستحيل لاكن قلت لازم .
- إلا الآن مارحت لطبيب نفسي كنت أجهل ان في دواء نت احسب راح يقول لي حاول تهدأ وتاخذ نفس وكنت اطبقه في البيت بدل تكلفة الطبيب .
- علاقاتي تدهورت جدا مع الناس جدا جدا لأني كنت اجتماعي بكل ماتعنيه الكلمة اجتماعات وطلعات ومشترك في اندية ثقافية ورياضية يوميا أخرج مع أصحابي وهذا كله تغير .
- طبعا في ناس قطعوها معايا نهائيا انا متفهم انهم مايعرفوا ايش في داخلي لكن ان كان في شي تعلمته من هذا المرض اني اعذر الناس وكل انسان عنده ظروفه
- بدأ الدوام للجامعة بسم الله مسكت خطي وفي يدي القران لعله يهديني شوية لما اركز على شي ثاني غير الخط
- اول مامسكت الخط لقيته واقف ومعبا سيارات ياسلااااام هذا هو الي ناقص طبعا نسيت ام الجامعة وبس ابغى يوتيرن ارجع منه للبيت بدا العرق يتصبب من كل مكان حتى اظافري طلع منها :)
- ودخلت في نوبة متوسطة وركزت في القران ورجعت البيت
-طبعا كنت اكره اني أدخل مثل هذا القسم والمنتدى لأني راح اعترف بمرضي لو دخلت وانا كنت في معركة شرسة معاه مرة يغلبني ومرة اغلبه
- استسلمت ورحت لطبيب نفسي وطلع فيه نوعين نوع يصرف دواء وهذا الي رحته ونوع ثاني يعالجك بالكلام وهذا مهم جدا لكن حالتي كانت تستدعي اني انهي الوضع بأسرع مايمكن .
- اخذت دواء نسيت اسمه في منه علبه ووردي وفي أزرف حيب الجرعة
- بدأت بجرعة قليلة جدا وبعدين زدتها
- طبعا الدوام مستمر وانا ساحب اول اسبوع قلت عبال ماياخذ الدواء مفعوله
- لكن المفعول تأخر وبدأت الدراسة فعليا ومسكت خط الجامعة وفي يدي مصحفي ويادوي وصلت ماصدقت على الله :)
- عقلي مشغول طول الجامعة في طريق الرجعه وكيف حعدي وهل هو زحمة
-طبعا هذا التفكير ساذج جدا لكن لن يفهمه الا من اصيب بها ولا يمكن لغيره حتى الطبيب النفسي ان يفهمك (هذا في وجهة نظري ) لذلك اثرت الصمت على التحدث لأي شخص
- طبعا ولله الحمد كنت اشحن نفسي بالتحفيز والثقة بالله في محاربة هذا المرض لأنه يحتاج لهمة وانك ماتنكسر له اذا زاد عليك وكل مايزيد عليك زيد عليه واول ماتستسلم له يكون قضى عليك بالضربة القاضية .
- طبعا طولت في قضية خط الجامعة لكن من جد كانت مؤرقة وكان في يدي المصحف طيلة شهرين تخيل !! الناس مستمتعه وانا شايل هم الطريق !
- الدواء كان بدا مفعوله وكل مرة يسألني الدكتور واقله الحمد لله لكن مازل ويزيد الجرعة
- يدي تعبت من الكتابة وبنهي الموضوع الخلاصة اني في النهاية الحمد لله شفيت وان الدواء بعد فضل الله والنادي لها اثر كبير
- النادي كنت استرخي فيه بشكل كبير جدا خصوصا فيه أشياء استرخاء كثيرة منها المساج والي له دور كبير .
- الحمد لله انهيت الترم وانهيت سنة بعده وتخرجت وتوظفت والحياة حلوة ونسيت تماما والآن اسافر لمدن بعيده لوحدي بالسيارة وانا الي كنت ما اقدر اروح مكان قريب .
- الشئ الي بوصله صدقني الأمل قريب اهم شي لا تستسلم وحتتذكرها كذكرى فقط وتضحك على نفسك .
-الضربة الي ماتقتلك تقويك , نوبة الهلع تعلمك تعذر الناس تعلمك فهم الناس تعلمك الصبر تعلمك كيف تتفائل .
|