نفساني - عرض مشاركة واحدة

24-02-2004, 01:56 PM

يا ناس وش أسوي ساعدوني .......ياهووووووو 19_63.gif

::

5 .... قصتي وما فيها إن ..........

شغالتنا عرت علينا و قالت فجأة إنها بتسافر ... طبعا ما قلنا لها شي
و خليناها تسافر ... لكن طلب شغالة ثانية يتطلب من 3-4 شهور على الأقل

لذلك اضطرينا أنا و أمي و خواتي إنا نشتغل في البيت على ما تجي الشغالة الثانية ... طبعا ما تغير علينا شي لأن حنا من وجود الشغالة و حنا كل وحده
تسوي شغلها بروحها ... بس إللي زاد علينا تنظيف البيت و الغسيل و المواعين

المشكلة .. إن قبل سالفة عيد الأضحى إللي تعرفونها كان المطبخ علي ..
و كنت أنظف عدل .. على أساس قول الرسول ( بالمعنى ) إن إللي يبي يسوي
عمل فاليتقنه ... , صرت مع الدوام ما أنام إلا من 3 -4 ساعات في اليوم
لأني أشتغل و أدرس و أشبك على النت .. أمس إللي صار.. مواعين الغدا
غسلتهم كلهم إلا جدرين كان فيهم تحكك ( الأكل المحروق في قاعة الجدر )
نقعت الجدرين و قلت على ما أشبك عندي 2 ساعتين ( مثل ما هو موجود في جدولي تنظيم الوقت إللي مسويته )..... و بعدين أنزل أغسلهم
شبكت ساعة , الساعة الثانية قلت بريح لي شوية و كوكت الساعة عشان تصحيني
لكن من كثر ما أنا تعبانه نسيت عمري بالنوم , ورنت الساعة سكرتها و كملت
نومي ... و نسيت سالفة الجدور , لكن إللي صار , إن البيت كله قلب ضدي
فوق ما هم قالبين من السالفة القديمة إللي انتو تعرفونها ,

المهم : فجأة سمعت صوت خواتي يكلمون أمي بصوت عالي يحتجون على
سالفة الجدرين ... وخاصة صوت اختي الأصغر مني الملسونة

و من بين الحديث سمعت و هم يقولون لأمي خلينا نروح نفزعها من نومها
عشان تغسل الجدرين ... شان أمي تقول : لا لا تقعدونها ( على بالي في البداية
إنها تبي راحتي) ... لكن بعد هالكلمتين إللي قالتهم .. قالت : عشان باكر
نخليها تغسل كل الصحون عقاب لها .... أنا ما همني كل الكلام لأني
كل يوم قاعد أغسل الصحون ... لكن الكلمة إللي بكتني ... هي

عقاب لها

لا و اليوم بعد **وطة النقعة إختي الأصغر وحدة إللي ما فقصت من البيضة اللي
ما ينسمع لها حس
قامت تصارخ علي ... إيه مو صغرت بعينها ... الكل يصرخ بوجهي الكل من
غير استثناء ... هذا إللي خلاني أبكي زيادة

وعلى طول دخلت عليكم في المنتدى .. السالفة توها صايرة
ودموعي تارسة وجهي ....

كنهم ماخذيني من الشارع ما كني بنتهم .... سبحان إللي ما ينسى , سبحان
إللي ما تغفى عينه ... كل هذا عشان غلطت مرة , وش صار انقلبت الدنيا

لا و المصيبة الأكبر اختي العودة إللي كان عليها امتحانات مؤجلة في الجامعة
كانت تدرس للإمتحان يوم تسافر الشغالة , و كنت أقول لها : خلي شغلك
علي انتي بس درسي لإمتحانك عدل هذي لك السنة الأخيرة قدمي فيها زين

وبعد ما امتحنت نست كل إللي سويته , و على سالفة أمس هي إللي غسلت
الجدور من بعدي و قامت تتحلطم , وش صار على جدرين زلزلتوا البيت ؟

صدق من قال : إذا أكرمت الكريم ملكته , و إذا أكرمت اللئيم تمرد
هالناس ما فيهم خير حتى لأهلهم ... تشوفهم برة مع أصدقاؤهم
زي السمن عالعسل ( مثل ما يقولون اخوانا المصريين ) و عندنا النفس
شينة .... يا عالم خيركم خيركم لأهله

و الله أدري إني أذيتكم بمشاكلي ... لكن تحملوني
وش تبون يجي من وحدة مينونة و معقدة و مريضة نفسيا ؟

شوروا علي بالسافة إللي صارت

الله لا يحرمنا من مشورتكم .......ياهووووووو 19_63.gif

::

5

المصدر: نفساني