نفساني - عرض مشاركة واحدة - ألم قلبي اتمنى ان يتابعه اخصائي لانني اريد ان ارتااح

25-02-2004, 09:02 PM

مساء الخير ... الم قلبي ... ماعدتي تندمجين مع البنات اللي في مثل سنج ومنتي على طبيعتج ومتحفظة مثل ما قلتي ... ليش ؟ اتشوفين العيب فيهم ولا تشعرين بنقص فيج انت ؟ ودي عشان ينفتح هذا الجانب اكثر ان تجاوبين على سؤالي وتضيفينله السبب ... مثلا ... قلتي العيب منهم ... ليش ؟ ... او قلتي ان النقص عندج وانت محرجة منهم ... أيضا ليش ؟ ... عشان افهم السبب من وجهة نظرج ... هل هو فقط مثل ماذكرتي خوفج من فقدانهم بعد التعلق فيهم ؟؟؟ ... ثم ... الصداقة من العلاقات المبنية على الحاجة النفسية بالدرجة الاولى ... والحاجة لا يقصد فيها المصلحة بمعناها السلبي ... يعني ... كلنا عندنا حاجات نبي نشبعها من ورا صداقاتنا والاخرين كذلك لهم حاجات نفسية ... فإذا احس الناس ان اللي جدامهم يحبهم ويهمه ان يكون معاهم ويشعر ناحيتهم بايجابية ويسأل عنهم ومافيه غرور ولا تعالي ولا شموخ يطلعه عليهم راح يلجأون له ويحبونه ويصادقونه ... في الصداقة يكون المغرور وحيد ... المتكبر وحيد ... المتعالي وحيد ... المتفاخر بنفسه وحيد ... الحساس ايضا وحيد ... والناس يموتون في المتواضع ... وكل مازاد تواضعه زاد عظمة عند الناس ومكانة وصيت ... ومن تواضع لله رفعه ... يعني نيّة التواضع لأجل الله ... اذا كنت مثلا ناطرة ان الاخريات يحسسونج بقيمة معينة وانت واقفة مكانج مافي شي راح يصير اطلاقا ... وكل العملية مضيعة وقت واحباط ... كل اللي عليج ان تكونين واثقة من نفسج ... مرحة ... في قمة التواضع ... متفائلة ... مؤدبة وسلسة في التعامل ... لطيفة ... مركزة ومتواصلة ... وماراح يكون مصير صداقاتج الا كل خير ... وبعدين مرات يضطر الواحد يكون بروحه لان صديقاته مو معاه ... اخذيها ببساطة ويسر ... مرات حسي انج وانت بروحج ملكة نفسج ومافي أحد معاج يقيدج ... تسرحين باللي تبين وتفكرين ... وتسترخين وكأن الوقت وقّف فجأة وانت قاعدة في مكان مظلل حلوو ... والناس رايحة رادة ... والجو هالايام حلو بالكويت مادري عندكم شلونه ... وفجأة تلمحج وحدة من اللي ابتسمتي وياها وعطيتيها كلمتين حلوين ... وتحاول تتقرب لج ... عاد انت رحبي فيها وقوليلها حياج حياج ... هلا والله فيج ... واستمعيلها وعامليها مثل ماتحبين ان تعاملج وتسمعلج ... على آخر الكورس راح تكتشفين انج كونتي صداقة متينة وباعثة للراحة ... خصوصا اذا كانت البنت من النوع الايجابي بشكل عام وفيها من مميزات الصديق الناجح ... عموما تقدرين تختارين الافضل من اللي تقابلينهم ولازم يكون الاعجاب من الطرفين عشان تتكون الصداقة المتينة ... ولا تكترثين للصداقات العابرة لأن كلها مصالح وبس ... مافي نوع من التواصل العميق في العلاقات هذي ... العابرة ... صديق سنع افضل من 100 بوطقة ... وبالنسبة للسلام بادري فيه من غير ماتعملين حساب لهذه النقطة الهامشية ... والبادي أكرم ... لا تعملين حساب لأي وحدة مايهمها السلام انت سوي اللي عليج وخلي اللي على الناس على الناس ... يعني لو كل يوم تسلمين على وحدة ما اترد عليج لازم ما تهتمين ولا تحطينها في بالج ولا تعملين لها اي تغيير في نفسج ... خليج تسلمين
... لأن انت معدن غير ... وهي غير ... وراح تكونين في هالجزئية أحسن منها وأكرم وأكثر ثقة بالنفس ووعي بالحياة وبالمفروض وبالأدب والفن والذوق ... أما عن أحاديث البنات اللي تشعرين انها سخيفة او عديمة المضمون او هدامة ... فمحد قاصبج تقعدين او تستمعين لها ... خلج حرة نفسج ... لكن لابد ان تلاقين ناس معدنهم ذهب يكونون صديقات حميمات لج بالمستقبل بحيث تتكلمون بمواضيع تشوفونها تستحق فعلا تحريك اللسان والمحاورة ( ولا تنسين كل شي ينبني بالتدريج البطئ ) ... والتكملة في الرسالة الثانية