نفساني - عرض مشاركة واحدة

30-05-2014, 04:33 AM

النصيحة الثالثة: الشخصية القلقة
سؤال: لو ركبت طيارة، او حتى سيارة وماكنت انت الي بتسوق، وقدامك رحلة طويلة، هل ممكن تنام بعمق فيها؟
اجابتك بنعم يعني انك انسان لاتتأثر كثير بما يدور حولك، وميزة دي الشخصية قوة تحملها للمطبات النفسية
اما اذا زي حكايتي تفضل صاحي طول الرحلة فشخصيتك من النوع الثاني

طيب عرفت اني من الشخصيات القلقة فين المشكلة؟
المشكلة او المشاكل يطولي بعمرك هوا انو طبيعة دي الشخصية تأثرها بما يدور حولها، دي الشخصية ضميرها حي جداً وقاسية على نفسها بشكل لايوصف
محبة للمثالية والكمال، و و من الامور الي تعتبر في ظاهرها ايجابية لاكن جوتها سلبيات كثيرة.

اخلص علينا وهات من الآخر، ايش هيا المشاكل؟
طيب اذا تبي الزبدة انا باقولك بس هدي اعصابك، اهو شفت انو شخصيتك قلقة؟ من اقل شي عصبت هههه آسف ع اضاعه جزء من وقتك
المشكلة انو قليل من الناس يعرفو واكتشفوا ان دي الشخصية عند زيادة حدة الضغط عليها تبدا تظهر عليها اعراض تسمى نفسوجسدية
مثل الصداع، الضيقة، حركات لا ارادية، وغيرو من الاعراض المزعجة، ولا احكيكم عن القولون العصبي والتهاب فم المعدة

هنا يبدأ الشخص يبحث عن علاجات عن كل عرض يظهر معاه وطبعاً المجرم والمتسبب الاول المعدة، غالبية الدكاترة الان سارو يصفو علاج للجرثومه، لاكن
لاكن، انتبهو وركزو، اعراضكم هذي ماراح تروح بحبة مضاد!! لانو زي ماقلت سببها نفسي بالاساس وحتى لو عندك الجرثومه نشطه علاجها حيريحلك معدتك شوي لاكن سرعان
ماترجع تلتهب عليك من التوتر!! وارجع ابحث في النت عن طبيعة دي الجرثومه حيث انو كثير من الاطباء ايضاً لايعترفوا بها ويعتبروها من الجراثيم الموجودة في كل انسان وتنشط عند التوتر
ومو كل حالة تتطلب اعطاء مضادات لعلاجها وخاصة النفسية منها!! هذا الكلام ماقلته الا بعد خبرة طووويلة وع فكرة اخدت كورس الجرثومة مرتين من غير فائدة تذكر!!

لسا مو مقتنع بكلامي؟ خلاص ياعم روح وجرب كورس الجرثومه والله يعينك عليه، بس لاتتفاجأ انو بعد الكورس حسيت بآلام مرة ثانية بالمعدة!!
طيب يابشمهندس ايش العلاج اذا لاعلاج قولون نافع ولا معدة ولا غيرو؟

افضل علاج للاعراض النفسوجسدية هيا الحركة والرياضه والترويح عن النفس، بس بحكم جونا كانك في قدر ضغط فانسى انو تروح عن نفسك لبرا البيت الا اذا كنت من ابها او الطائف ف ياحظك مقدماً : )
اكن تقدر تسوي هوم جيم بالبيت فيه دراجه هوائيه منزلية او سير
وتمشي كل يوم وانت في بيتك في الغرفة المكيفة، الرياضة ثم الرياضة ثم الرياضة افضل علاج للاعراض الجسدية الي سببها نفسي، طبعاً مع اخذ الدوا بانتظام، جرب وقولي النتيجه بعد اسبوع : )

والله الهادي الى سواء السبيل وشافاكم الله وعافاكم وايانا والمسلمين يارب