نفساني - عرض مشاركة واحدة

01-06-2014, 03:34 AM

النصيحة الرابعة وعنوانها: عيش طبيعي
لازلت افتكر الايام الصعبة الي كنت حابس نفسي فيها بالبيت واراقب كل حركه في جسمي عشان افسر لها مرض، والي زاد الطين بله اني سجلت في منتدى مختص بالرقية الشرعيه وهناك زاد الوهم وسار وهمين
غير طعم خلطة زيت السمسم مع زيت حبة البركه مع زيت الزيتون والي للان ريحتها في انفي وكانت بتوصية من كبيرهم في المنتدى ادهن بيها واشرب ملء كاسة!! وع اساس يطلع مني العمل او العين او مادري ايش بالضبط
اي جهل كنت عايش فيه واي استغلال من اصحاب الخلطات ماقول الا الشرهة على الي تاركلهم مجال والغلط مني اكيد بس الانسان يعيش ويتعلم
المهم مالكم بالطويلة، عشت ايام صعبة خسرت فيها اعتقد 15 كيلو والي اصلاً كنت في امس الحاجه لهم لان وزني نحيف، ماسرت لا اكل ولا اشرب ولا انام، عطلت بنفسي كل حياتي بسبب التردد والخوف!
بدات بعدها رحلة العلاج النفسي والي ولله الحمد اعتبرها ناجحه الى حد ما، وإن مازلت للآن وانا مستمر على الدوا وماشوف في ذلك اي عيب او نقص بالعكس، الشخص الخايف والمتردد في رايي هوا الي يحرم نفسه ويوقف حياته عشان مايبغا يتعالج
استمرت حياتي بعدها في تحسن تدريجي وكنت اتعلم كل يوم من دروس الحياة، شفت مرضى صرع وتشنجاتهم وآلامهم، ومرضى سرطان كنت اتابع حالاتهم في تويتر واشوف كيف عايشين وكيف نمط حياتهم
اقولكم شي غريب، جميعهم كان عندهم تفاؤل بأن الله هو الشافي ومرضهم ابتلاء بس مو اقوى منهم ومن ارادتهم وهذا الشي الي يخليهم يصرو على الخروج رغم مرضهم لنزهة في حديقه المستشفى او حتى الهرب الى احد الاسواق او المتنزهات
للترويح عن نفسهم، الشي هذا اثر فيا كثييييير، وحسيت انو انا لازم اتغير ولازم اغير تفكيري، لازم ماحصر تفكيري بالاعراض واني انا المريض الوحيد بالعالم، الشخص الجالس جنبي قد يعاني من السكر والضغط والقلب وتجد ابتسامته لاتفارق محياه!
ابي اسالك كم سؤال، هل العالم يدور حولك فقط؟ ولمتى حتقعد بالبيت خايف ومهلوع؟ ماجا الوقت الي تتخذ فيه قرار العلاج تمشي فيه تبدء تنجز في حياتك؟
كثير من المهلوعين يحسب انو مرضه مستعصي وماله حل وهو في الحقيقة مرض يبغاله صبر وطولة بال وحسن ظن بالله مو اكثر مع العلاج الدوائي اذا الحالة تستدعي ذلك (في حالات يكفي فيها العلاج بالاقناع بس مو كلها وانا من النوع الاول)

لازم تدفع ثمن صحتك، اولاً بالدعاء والالتجاء الى الله وثانياً الدواء واخيراً بالالتزام بنمط حياة جديد
احب اقول لكل مهلوع او قلق او متوتر، انا مثلك واحياناً اكثر، اقلق مانام احياناً الا ساعتين واصحى، تجييني حالات ضيقة وحزن وتعب، هذي طبيعه الحياة ، اصحى وركز وافهم انو الدنيا مو مكان مثالية، وكل الناس بتعاني مافي احد مرتاح ع قولهم بس الي اتعود ع الرضا والحمد هذا هوا الشاطر والي فهم الدرس

اتمنى تكون النصيحة فادتك ولاتنسى تطبق وسيبك من المثالية الزايدة وروح جرب و افشل ولاتخاف من الفشل حتلاقي نفسك افضل بكثير مما اتصورت عن نفسك ومو بعيد تنجح في الشي الي مقدم عليه والله يوفقك ويشافيك مقدماً: )