نقول تيس تقول احلبوه، نقول هذا القمر تقول أبآكله، نقول لها هذي خرابيط ودجل وتقول كرامة ورحمة من الله موجودة البعض ما يدري ولا سمع عنها!!، وين إحنا عايشين بالمريخ ما سمعناها!! إيش ها الكلام الفاضي، إلا سمعنا عنها وشفناها ولا شفنا منها إلى اللعب على الضعفاء والبسطاء، وما جنوا منها غير الهموم والغموم على همومهم وغمومهم الأولى، وغير كذا سُرقت أموالهم باسم الدين وضُحك عليهم!!! يعني غصب تبيننا تصدق هالخرابيط والخزعبلات!!! بعد اسمعي ترى الهندوس يعبدون البقر ويحسون إنهم يطيبون إذا راحوا حق البقر أو الحمير أو الفار واستشفوا عندها!!! أو بعد تبين تقولين لنا هذي رحمة من الله!! ولازم تسكتون وتحترمون عقائدهم!! أنت وين رايحة بتفكيرك!! كيف تبين الناس يقتنعون بالخرافات والبكاء عند القبور والمقابر والجثث التي تحللت وما عاد تنفع نفسها فضلا عن نفعها للآخرين، والله مساكين اللي مازالوا مقتنعين إن هذي الخرافات والشعوذة والدجل والطواف على القبور تحل المشاكل، أنا متعجب متى الناس تبي تصحي!! ويعرفون باستغلالهم من ناس همج كل همهم يودونهم بدواهي تقضي على عقولهم وآدميتهم، ينبغي أن نحذّر الجميع إنهم ما يصدقون هالدجل والخرافات التي لا تليق بهذا العصر المنور بالمعرفة والاختراعات، وأحذّر كل واحد إنه ينجر وراء المشعوذين ودعاة الدجل والمقابر وسراق الدنيا والدين، لأن هؤلاء الدجالين ما يرتاحون إلا يشوفونك تمشي خلفهم بدون عقل، وتسلّم لهم آدميتك، ولا تسأل من وين جابوا هالخرابيط على شأن ما تخسرهم بتجارتهم أو بالأصح سرقتهم المقيتة.