نفساني - عرض مشاركة واحدة

23-03-2004, 12:51 AM

السلام عليكم يادكاترة..
مادري هذي مشكله ولا لا ..
لكني احس طول الوقت ان دمي محروق ... وانة يغلي...
مع العلم ان فيه ناس اقابلهم كل يوم ودي اجيب بنزين واحرقهم ..
اتنرفز من وجودهم..واعتقد هذا السبب ويمكن لا ..
لكن صاير معاي عملية حرق دم مستمره..
وابي اخلص ...
الفكره اني ما غيرت بعاداتي من مده..مقابلة نفس الوجيه...اكل نفس الاكل (( وانا عامله رجيم هاليومين ..وزايده خياسه نفسي))
ومعد لي خلق اضحك ولا اسولف ..حتي الافلام اللي كانت تبسطني معد تروق دمي ..
ساعات لما اشوف فيلم (( خلي بالك من زوز )) او اي فيلم طلع بالسبيعينات واوخر الستنيات مثل (( حب وكبرياء)) ..يونسني شوي ..او سماع الاذاعة ..
بس الراديو هاليومين ما يلقط كويس وافتقدت احب برامج علي قلبي (( نافذه علي التاريخ- اخبار جهينة-تلفون اخر الليل )) وصايره منرفزه ..حتي الراديو اللي احبة ما يلقط زين الا بالسياره وانا ما احب اطلع كثير واذا شغلت راديو وانا طالعه ..نرفز البيت كله علي.. وندخل بلغط وجدال بيزنطي كيف اني عجوز ومتاخرة...كله لاني احب الراديو ..ويسموني الشايب..
والتلفزيون صاير يدوشني مره ...
مادري... فعلا محروق دمي ..
هذا غير اني شايفة اصدقائي بمراية ثانيه ..مرايه انهم ما يصلحون (( بس كلها يومين واروق عليهم ))..
وصايره اطلع بمزاج غريب..ان مايكون لي خلق اصحابي .. فمعد اسال عليهم ولا ابي اشوف رقعه وجيهم ولين كلمو اقعد اسب في التلفون اللي مطلع رقمهم ..

ومع كل هذا النرفزه تلاقي انه ما يبان علي.. وشكلي رايق...
بس بديت الاحظ وجود تكشيره ملازمتني..بشكل بسيط يعني وجهي ماعاد انبساطي ومبتسم..
واذا احد سولف علي ودي انة يسكت واقعد بداخلي انعته بابشع النعوت ..
ونفسي احذفة بشي جنبي.. مع ذلك تلاقينى مره هاديه قدامه واتفاعل معاه بكلمات مثل(( اففففف متي حصل هذا -- لالالا مو معقولة-- ياااالله ..الله يكون بعونك )))
وتلاقي اللي قدامي مستمر سوالف ورغي وممكن يحكي مشاكله وانا ودي ارميه من الشباك ...
وساعات تطلع مني قلبة وجه(( وهذي اكثر شي ينرفز امي واهلي )))
لا شعوريا اقلب وجهي..واتصدد ..ومعد صرت انتبه لهاحركه ..

رجاء خاص ..تراني فعلا ممتره..وابي حل اني كيف اضبط تصرفاتي الداخلية ..
اللي بدت تنعكس بشكل علي وجهي ...وتعابيري..

ولكم الف شكر

قلب ممتره ومحروق دمها ..

المصدر: نفساني