مشكلة اخوي..

مشكلة اخوي..

السلام عليكم ورحمة الله وبركاته

اولا احب اهنيكم بالموقع الجميل جدا فكرة ومضمون ..اللهم أجعله في موازين أعمالكم..

ثانيا أتمنى من احد المستشارين او الاساتذه الاختصاصين مساعدتي لاني بإمس الحاجه لها

المشكلة ليست مشكلتي بل أخي اعتقد ان مشكلته عويصه ومتأكده ان حلها ياخذ وقت ويبغالها صبر

بتكلم عن تاريخه شوي عشان تساعدكم في فهم حالته هو الاخ الكبير.. اجتماعي بطبعه..عمره الان حول الثلاثين سنه..عنده تراكمات من الفشل..
فهو فشل في دراسته وتعثر كثير ويالله كمل الثانوي بالرغم من انه ذكي

تربيته فيها خلل كبير ..كانت تنقصه المتابعة والاهتمام بفترة مراهقته وشبابه

تشوفه وتسمع كلامه وطموحه واحلامه ومناقشته للقضايا وتفهمه للامور تقول رجال ماشاء الله عليه كله حكمه وفهم وهذي شهادة اغلب المحيطين فيه

وتعاملها رائع سواء معي او مع امي او مع خواتي ..وماعمره غلط علينا بشيء

لكن يفاجئنا بمشااااااااااكل تدمي القـــــــــــلب.. وتحتار بين كلامه وبين تصرفاته

واكثرها لها دخل بالقضايا المالية

مثلا في ايام مراهقته اخذ مبلغ مو بسيط من الوالد بحجة انهم يبدأون تجارة لشراء سلع معينه وسافر لاحد المدن العربية وضيع الفلوس ورجع (هالشيء مازال مأثر عليه)

اتذكر وانا صغيره برضه انه اخذ تلفزيونات من البيت وباعها وماندري وش يبغى بفلوسها

سياره كانت عنده وباعها والله اعلم وش كان يبغى بفلوسها

هو صحيح الان متزوج وعنده ثلاث اطفال وراتبه يالله يمشي بس مو لدرجة انه يتصرف بهالشكل

يتغيب عن عمله كثير احيانا توصل لشهرين متتالية

في مره من المرات حصل خلاف بينه وبين زوجته وراحت لبيت اهلها بعد فترة اكتشفت انه رجع الشقة وباع كل الاثاث الي فيها


زوجته انسانه غير متطلبه وواقفه معه وصابره عليه وعلى حسب كلامها ..انه يحلم انه يعيش حياة مثالية يشتري بيت..مايقصر على زوجته بشيء..يدرس عياله بأحسن المدارس
..يساعد أهله..يكون اخ كبير لنا ..


الان بالرغم من حياتهم يالله تمشي بالبركة لكثر متطلبات الحياة الا اني الاحظ عليه انه يصرف ومايهتم يعني ابدا مايعرف يوازن الي معه وحتى زوجته
ملاحظه هالشيء

تصرفاته تدل على انه لامبالي ومايهتم في بيته وعياله لكن احلامه وكلامه يدل على العكس

بصراحة تعبت من كثر ماافكر بوضعه المشكلة مايفيد التفكير مجرد اني ادخل في متاهة واطلع منها بدون ماالاقي حل

هو قبل فترة نتيجة ظروف معينه جاه اكتئاب تحت الحاح مني راح لطبيب نفسي(د . عبدالله السبيعي) جلسه وحده وقال ان عنده اكتئاب وعطاه علاج وقاله احتمال انه يكون عند انفصام بالشخصيه ومايتحدد هالشيء الا في الجلسات الجايه لكنه انقطع وماكمل ..قال انه راح يعالج نفسه بنفسه لانه مو مقتنع مره بالطب النفسي وغير كذا انه مكلف كثيررررررر

في الفتره هاذي حالته كثير متدنية لان حلم من احلامه انهار كان بادي بمشروع تجاري وبنى عليه احلام كبيرة..
هو بهالمواقف ينكسر ويضعف وتسوء حالته كثير ويلجأ لاشياء تدمره

هذي مشكلته باختصار شديد..
فيه بعض الاشياء ماذكرتها ..
اذا فيه شيء غامض او المشكلة ماهي واضحة انا مستعدة للإجابة على اي استفسار..
واسفه على الاطالة

المصدر: نفساني

انتظر الرد

الله يخليكم المشكلة متعبني ومحتاجه رأي احد الاستشارين

نشكرك على الإشادة بالموقع ولكن لا أدري هل من حسن الحظ أو من سوئه أن يرد عليك د.السبيعي أيضاً.

أختي المعلومات التي قلتيها الآن لا تجعلني أقكر في أنه مكتئب أو فصامي. بل تجعلني أشك أنه يستعمل مخدرات. لا لسبب إلا لأنك لم تذكري من شكوى لحالته إلا أنه يصرف فلوس ولا تدرين أين تصرفها.

أعتذر عن وضوح طرحي وصراحته ولكن هل سألت نفسك؟ الرجل يتكلم حسب ما أوردت بكامل قواه العقليه و لديه طموحات و آمال و... (لا إكتئاب ولا فصام) لكن يغيب عن العمل بالأشهر ويبيع حتى أثاث بيته ولا يعود بشيء؟؟؟؟؟؟؟؟؟؟؟؟؟

الله معك والسلام.

الف شكر لك د.عبدالله على ردك
واشكرك على صراحتك ووضوحك وبالعكس تسعدني صراحتك
بالنسبه انه يستخدم مخدرات جا على بالي هالشيء..وكذا شخص من المحيطين فيه ومهتمين بحالته فكرو بهالشيء ..بس كلنا استبعدنا هالاحتمال..
لان مدمن المخدرات مايستغني عن هالمواد ويكون دايم بحاجه لها لكن اخوي قعد عندنا شهر تقريبا ومايطلع ابد ومالاحظنا عليه شيء..

هو تجيه فترات مافيه احسن منه ويلتزم بعمله وبيته..وبعدين لما تجيه ضائقه ماليه يرجع وتتدهور حالته ويلجأ للشراب كهروب حتى قد يوصل لمرحلة الادمان(يشرب بشكل يومي)..
انا احس انه عنده مرض نفسي عشان كذا فكرت اطرح مشكلته عليكم وانتم ادرى بهالامور..

هو احد امنياته انه يكون غني وطبعا كثير هالامنية عندهم ومافيه احد يكره انه يكون غني بس احسها عند اخوي بشكل مرضي مادري كيف اشرح لك..بذكر لك أمثله..
- اصدقائه كلهم وضعهم المادي ممتاز يحب يخالط هالطبقة..
- مره وداني الجامعة وشاف السيارات الي عند البوابة اغلبها سيارات فخمة..انبهر وحسيت انه اعجبته جامعتي وتخصصي..

الف شكر لك مره ثانية

لا زلت أشك بشكل كبير في موضوع الإدمان وبالذات عندما تقولين انه يشرب عندما تضيق به الدنيا. ثم كونه يجلس بالبيت شهر ما يطلع هذا لا يعني أن ليس هناك إساءة استخدام (وليس كل المخدرات عليها إدمان) و إن كانت كلها دمار نسأل الله العافية والسلامة

هل يثقل عليك لو مررت علي ومعك هذه المحادثة لأراجع ملفه و نعيد الحسابات من جديد؟

والسلام.

مشكور على متابعتك للموضوع جزاك الله خير
ماعندي مانع ممكن اجي انا واخي فهو متابع لحالته مثلي ومحتار في وضعه ايضاً..ماهو الوقت المناسب لك دكتور
الف الف شكر لك

في الانتظار thanx