اختي

اختي

انا عندي اخت ساكنه معاي بالبيت مع اخواني وامي..
الفكره ..ان اختي هذي اصغر مني بسنة بس ..وحرمه كبيره ..كلنا حريم كبار..
لكنها فيها امور مزعجة من زمااااااااااااااان ..
1- تتكلم بصوت عالي يصل لدرجة الصراخ .
2- طول الوقت تنتقد اللي حولها . خصوصا انا وامي ..
3- ما تبي تسوي شي وتفضل ان الاخرين يعملونه ( مثل امور البيت ).
4- ترتبط بصديقة وحده مده طويله وتختارها اصغر منها دائما ..زمان كان الفرق 5 او ست سنين اللحين صاير الفرق يوصل لعشره سنين ...وما تطيق تصادق اللي بعمرها ...ومطيعة جدا .. واذا حصل ان صديقتها تزوجت تحصل قطيعه بينهم ..وتقول ان صديقتها كشتت فيها .
5- لو حبيت اشتري جهاز تلفزيون مثلا او كمبيوتر..او طاوله ..تقعد تقنع فينى ساعه وتصر انها تبيعني شي من عندها ..حولت بيتنا لسوبر ماركت لاغراضها وتصر انها تبيع علي الرغم ان محد يبيع غيرها ..حتي والدتي باعت لها .. واذا شافتني انا ولا احد من اخواني يعطي اي شي يحصه بدون مقابل .. تقنعه انه لازم يبيع ويسترزق الله .. ونسيت الروابط الاسريه اللي بينا .
6-تشيخ صحبتها علي.. وهذي الكارثه العظمي.. بمعني ان اي وحده تصادقها تعاملها مثل الاميره وتمشي كل طلباتها وتصرف عليها وتصر ان اهل البيت يصرفون ويعطون صديقاتها هدايا حتي لو شحذت عليها او تحايلت ..وتصر ان صديقتها انسانه مسكينه ومنكسره وضعيفة..وفوق هذا وذاك تجي عندي انا وتخلي صاحبتها ملاك وتفرض قوانين صارمه للتعامل معاها .. لحد يقرب لحد يمون علي صديقتى بينما تسمح لصديقتها انها تدخل غرف النوم حقتنا وتستخدم حماماتنا الخاصه وتخليها تطلع علي كل شي.. من باب ان صديقتها هذ مو صديقتها بل اختها واكثر من اختها ...
ادري بتقولون انتو اللي عطيتوها وجه ...
بس هي دايم تخلي صديقاتها يدخلون عليه اهلي بالحبابه وطيابه النفس..او يمكن هي تختارهم فعلا طيبين ..


8- طبعا اختي العبوس ما يفارق وجها طول ماهي مقابلتني بينما تضحك من قلبها عند الاخرين وقد عبرت من زمان فوق ال6 مرات انها تكرهني ..لكن انا كنت احبها جدا جدا..وكنت اتسامح مع كل مشاكلها وغثاها ...

9- تكره كل صديقاتي بلا استثناء حتي اللي ما تعرفهم ...لمجرد اقول اسمهم تكشر وتعبس وممكن تسب فيهم ..

اللي حصل الان اني صرت اكره اختي كثير وما اطيق اطل بوجهها ..
عانين فوق العشرين سنه منها..طبعا انا اكبر من كذا بكثير .. لكن كنت فعلا احبها من قلبي واخاف عليها ..

لكن الان من شهر تقريبا صرت اكرهها كره العمي ومو طايقه اشوف رقعه وجهها..
وصارت كل يوم تردد علي بسخريه ((( انتي في بقلبك حب..تقدرين تحبين احد ..)))((( وش فيك عاصفه وجهك )))
انا زعلانه علي نفسي لكن ايش اعمل ... غصب عني كرهتها ... فعايلها شنيعه ..
وما اقولكم اني ملاك ..بالعكس وقت اللزوم اعرف ادافع عن نفسي...

لكني استغربت كيف محبتي لها تحولت لكره ...
وليش مشاعر الكره هذي لما تطغي ممكن تكون سيئه ..
اعبر لك عن نفسي.. انا اقصي الكره عندي اني ابتعد عن الانسان اللي اذاني ..
وكل يوم افكر ميه مره كيف اني راح ابعد عنها وافتك من وجهها ...

ياريت تلاقولي حل ..

وسؤال :هل انا شريرة ؟

المصدر: نفساني