وسواس مدري اكتئاب

وسواس مدري اكتئاب

السلام عليكم ورحمة الله وبركاته ,
انا طالب مبتعث في الخارج وعندي مشكله اكتئاب يجي ويروح.
هالاكتئاب دايم يجي معي في منتصف الفصل , يعني اول الفصل الدراسي اكون متحمس واحضر كل الكلاسات لكن ما ان يحصل ادنى شيء او اي موقف بيني وبين دكتور اصير اطنش المادة واحس بالخوف اني احضر لها وحتى الاختبارات احيان ما اقدر اروح لها بسبب خوفي من الماده والدكتور.
الحاله هذي جتني ثلاث مرات تقريبا وفي كل مره احس ان المشكله اهمال مني لكن اكتشفت ان هالشيء غصب عني مؤخرا ً. مثال حصل بيني وبين دكتور جدال على درجه الاختبار ومن بعدها وانا اخاف احضر هذي المادة احيان اروح اوقف عند باب الفصل وارجع البيت وهالشيء يزيديني اكتئاب ويزيديني خوف من الماده ,
يمكن الموضوع بدأ من زمان لان فيني صعوبه في النطق الآن الحمد لله اخف من اول بكثير لكن اتذكر كانت تصير لي مواقف في بعض المواد واصير اكره الماده او الدكتور لكن ما كانت تعيقني عن الحضور والدراسه. الآن بعد اي موقف اجلس افكر الين اقهر نفسي واقول خلاص مابروح واريح نفسي من التفكير.
الموضوع هذا مسبب لي مشاكل كبيره حتى اني ماقمت اقدر انام يجيني وسواس اذا حطيت راسي. رحت لدكتور قبل فتره وقال لي ان عندي اعراض اكتئاب واضحه ونصحني ابعد عن الكافين وحولني على دكتور متخصص لكن الموعد بعد شهر وانا ماني متفائل بحكم ان الدكتور اجنبي ويمكن مايتفهم الوضع او المجتمع الي انا جاي منه لذلك لجأئت لكم .
اتمنى الي عنده خبرة او يقدر ينصحني لايبخل علي
شكرا لكم

المصدر: نفساني

الاخ ضعف
ممكن تشرح كيف حكمت انك عندك اكتئاب
هل يعنى لانك مبتعث محد يكلمك فى الغربة ولقيت حالك لوحدك بين اربعة جدران
هل انت عندك اعراض اكتئاب المعروفة عند المكتئبين
هل تستعمل علاجات معينة
اشرح وضح
لكن بشكل عام المبتعثين عندهم مشكلة الصدمة الحضارية وخصوصا اذا كانت اول مرة بيسافرون ويحكتون بثقافى غير ثقافتهم مما يخلى الصراع عالى والتكيف صعب لكن مع الايام بينتهى ويتعود
وكل علم وانت بخير

لا الموضوع بالنسبة لي مو صدمة حضاريه انا لي 3 سنوات في بلد الابتعاث وسبق ان عشت 3 سنوات اخرى خارج المملكه ومتعود على المجتمع والحضاره هنا.
بالنسبة للحكم انا مو متأكد انه اكتئاب لكن اذا جيت افكر احيان التفكير ياخذني لمناطق مظلمه واكره عمري واتمنى اني ما انوجدت. على العموم قبل كم يوم قمت بزيارة دكتوره نفسيه ومع النقاش قيمت حالتي على اساس انها فوبيا اجتماعية. انا ماني مقتنع بكلامها ميه بالميه لان مو بس يوم اكون عند الناس افكر واضيق ولكن حتى وانا وحدي. وتعليقا على كلامك بكوني مبتعث ومحد يكلمني الحمد لله انا عندي اصدقاء كثير ومعظم وقتي معهم للاسف كلهم سعوديين لكن انا مو وحيد ابدا ً ولا اذكر اني شعرت بالوحده. زي ما ذكرت في الموضوع انا كانت فيني صعوبة في النطق وحسب كلام الدكتوره ممكن هالصعوبه في النطق طورت عندي فوبيا اجتماعية لكن ما عطتني اي علاجات وحولتني على دكتور ميدكل ثيربي بعد شهرين وقالت هو الي بيده العلاجات. و على فكرة الموضوع ماله دخل ابد بكوني في الخارج حتى يوم كنت بالسعوديه في الجامعه كانت دائما تجيني نوبات هلع .
وش رايك ؟

وانت بخير يارب وبصحه وبسلامه

والله ياخ ضعف انا مع راى الدكتور انت عندك رهاب اجتماعى ناشى من صعوبات فى النطق وذى تحصل كثير
افضل علاج لك ( راجع العلاج النفسي العقلانى الانفعالى البرت الس ) دور عليةفى قوقل تلاقى انة عالج حالات كثير بالافكار اللامعقولة بافكار معقولة
انا عندى طلاب كثير مثلك وكنت انصحهم بتالى
1/ الرغبة فى العلاج والتصميم الداخلى
2/ الايجابية والتفائل بان هناك علاج
3/ اعمل تجارب مع من تحب من اصدقائك وتكلم معهم بحرية والقصد ان تتغلب على مخاوفك اثناء الكلام فى حالة وجود الغرباء
4/ اعمل مقياس لنفسك مقسم على عدد الايام وشف هل تحسنت او لا
5/ قبل النوم اعمل تنفس التفريغى وركز فقط على صورة واحدةانك غدا بتكون قادرعلى التحدث بدون خوف من الاخرين اهم شى ثق بنفسك وتوكل على الله وستج الفرق
وكل عام وانتم بخير