الاكتياب المصحوب بذهان

المشاركة الأصلية كتبت بواسطة عيون متفائلة

السلام عليكم ورحمة الله وبركاته

حياك الله اخونا

صادق يوم تقول داخل فقاعة

لو احد يقول لي تعالي الان لك جائزة شي كبير ما خرجت من بيتي

احس اني مبرمجة من يوم اصحى لين انام

احس اني في حلم

ما اقدر اغير من روتيني او اخرج

يوم توفى اخوي الغالي بين يديني قبل أربع سنوات قعدت اطالع فيه مدري وش اسوي

قعدت اتذكر رقم الإسعاف ما ذكرته لين بحثت في قوقل

انا ادري انه ميت بس عشان إجراءات الدفن

لان يوم عمي مات ابوي دق على الإسعاف الله يرحمهم جميع عشان إجراءات الدفن

اخذوني و اخذوه للمستشفى قعدنا من بعد المغرب لين الساعة اثنين بالليل عشان الإجراءات

انا لوحدي بينما الناس مجموعات حريم و رجال و سيارات مصفوفة كلن مع ميته و صياح و مواساة و أحضان .. و انا مكاني حايرة واقفة على جنب

سالوني يوم وقعت مين معاك عشان ننقله المغسلة قلت ما احد و لحقته بسيارة أوبر و انا احس اني احلم

وصلنا المغسلة اللي جنب المسجد ثم غسلوه ، و قبل أذان الفجر بنص ساعة قالوا تعالي ادخلي ودعيه عشان الصلاة عليه ، قلت وش فيهم هالخبلان كيف يقولون ودعيه و حنا اصلا نبي نرجع البيت سوا

و الله العظيم اني وقتها متشبعة بفكرة انه راح يرجع معي زي ما كان يرجع معي لما نروح المستشفى

طالعت فيه من بعيد لقيتهم ملبسينه مشلح بني كأنه نايم مغمض عيونه ، مافي شعور كل شعوري متى يرجع معي للبيت لاني تعبت من الوقوف و الارهاق

سبحان اللي ربط على قلبي لو ادري انه ما راح يرجع معي كان انجنيت

و بعد ما صلوا عليه رجعت و معي الأوراق اللي استخرج بموجبها شهادة الوفاة

طلبت أوبر و انا راجعة البيت كان الوقت ضحى ، شفت محل فول و جبت فول ، و معصوب عشان يحبونه اخواني. جبت على عددنا ، أربعة مو ثلاثة ، ماني مستوعبة اني تركت اخوي هناك تحت التراب ، حطيت الفطور على رف المدخل و دخلت انام

لاني من المغرب البارح و انا برا البيت

يوم صحيت من النوم استوعبت يوم شفت سريره خالي

أسأل الله الكريم أن يجمعني فيه بالفردوس الاعلى و موتانا و موتى المسلمين

اللهم امين يارب العالمين

الله يرحمه ويغفر له ويسكنه فسيح جناته ويرحم جميع موتى المسلمين


نفس وفاة أبوي ماستوعبت إلا ثاني يوم من وفاته بعد ما قمت من النوم وحتى وقت الي نمت حلمت فيه يقولي انا مامت أنا حي وكان شباب في الحلم عمره في الأربعين وكان طويل القامة وعليه لباس اخضر لون

وهو مات بسبب خطأ طبي عطوه إبرة مضاد حيوي وهو يعاني من القلب بعد دقائق من عطوه الابرة على طول تنفخت عيونه وتشنج والحمدالله ان في واحد من اخواني كان موجود معاه اول ماشاف حالته قاله تشهد والحمدالله الله وفقه في نطق الشهادتين

اللهم أرحمنا وارحمهم جميعا يا رب العالمين