أنا يتيمه, مالذنب الذي جنيته؟؟؟؟؟؟

أنا يتيمه, مالذنب الذي جنيته؟؟؟؟؟؟

بسم الله الرحمن الرحيم


قصتي اللي بقولها لكم اليوم بلا طولة حكي واقعيه وكل كلام فيها وتفصيل واقعي وحادث ويحدث وصاحبتها تعيش بينا .

أبي اقولكم قصة هالرجال هو وزوجته اللي قرروا يسافرون للمدينه المنوره,الرجال وضعه على قده ومرته بنت حلال مستحمله معاه على الحلوه المره ووضعهم على قدهم ويمكن اقل بكثير جا في يوم من الأيام قرر الرجال ياخذ زوجته وبنته الصغيره والوحيده عمرها شهر أو شهرين للمدينه طبعا هم من سكان بريده وتوكلوا على الله وركبوا هالسياره ومشوا في طريقهم .

وقبلهم بشوي كان فيه أسره ثانيه راكبين سيارتهم ومتوجهين للمدينه حرمه وعيالها صغار وأبوها والحرمه هذي أرمله توفى زوجها وهي عندها 24 سنه
وتعهدت انها ماتترك عيالها أبد ولاتروح ولاتجي الا بهم وأبوها ماقصر ماخلاها تحتاج شي وهي باره باهلها وكل واحد ماشي في طريقه ,وهم يمشون شافوا حادث مريع صرخت الحرمه لاحول لله السياره منقلبه الله يستر على اللي فيها عسا مافيها صغار ولا حريم قالها أبوها ايه والله يابنتي الله يكفينا الشر وينجيهم ,مروا من عند السياره شافو دوريات وشرطه وتعرفون الزحمه وشخصين ممديين على الارض ومغطينهم المنظر كان مريع السياره مندمره كل شي مقلوب كل شي طايح شنطة حرمه عقال الرجال ....
كملوا الجماعه وقلوبهم متقطعه من هول ماشافو وصلو للمحطه يبون يعبون السياره كان فيه واحد من الشرطه نزل الأبو الشايب سلم عليه وسأله يخوي الحادث اللي هناك ووش قصته ...أبد ياعم سياره منقلبه مات فيها رجال وزوجته ومعهم بنت صغيره سأله الشايب ماتت ؟؟؟؟ قاله لا البنت من الصدمه طلعت من السياره وطاحت على الرمل ماجاها شي ,حن قلب الشايب وقال لبنته
قالها يابنتي لو تاخذينها تكبسين فيها أجر حنت الحرمه وقطعها قلبها على الصغيره اللي ماتدري عن شي وسالو الضابط لو قدروا ياخذونها أو لا وافق بشرط يسجل عنوانهم وبطاقة الرجال وين ساكنين والتفاصيل عشان لو الصغيره طلع لها أهل يتصلون فيهم .

أخذت الحرمه وأبوها البنت وراحت بها للمستشفى تفحصها كشف عليها الدكتور وكلن متعجب سبحان الله ماجاها شي ...الله كاتب لها تعيش
خذوا البنت ومرت يوم ويومين وشهور وسنين والبنت تكبر ومحد سأل عنها

دخلت البنت المدرسه كبرت كبر عقلها معها بدت تسأل أبوي وينه؟
ماتعرف من الدنيا غير هالناس اللي ربت بينهم كل ماتسأل أمها يمه أبوي ماله صوره تقولها لا مات يوم أنا حامل فيك وماعنده صور أبد, صدقت بزر .
تسأل جدها أوصفه لي يبه يقولها يشبه كل هالناس شكله عادي. وطبعا بزر وصدقت......

وتمشي الايام وتكبر الصغيره تتعبها أسالتهم في المدرسه أبوك وش يشتغل ؟شلون تبي تجاوب اذا هي ماتعرف أساسا شكل أبوها ..تخرجت البنت من الثانوي استلمت الشهاده ومعها شهادة الميلاد وهي تتفرج عليهم لقت وبالصدفه انه شهادة ميلادها مافيها اسم أم أو حتى أبو, وهي كانت تعتقد انها يتيمة الأبو فقط تعبت البنت بكت كثير شكت كثير لصديقاتها اللي بسنها محد قدر يفهمها او يساعدها مابيدهم شي .......... البنت عرفت بالصدفه انها يتيمه الابوين عرفت بس بعد ماتعذبت كثير كانت تحس ,كانت تستغرب اسماء اخوانها ليش غير طيب امي تزوجت واحد ثاني ليش مايحكون عنه زي مايحكون عن أبوهم ليش ماعنده صور ليش ؟؟؟ أساله كثير انهارت حملت هموم كثيره قبل وقتها ثقتها بنفسها انعدمت تبي أحد يصارحها عن حقيقتها كل واحد يتجنبها يخافون يجرحونها مع انها بترتاح ومع ذلك في ناس كانوا في قمة قلة الحيا يتعمدون يجرحونها ويحرجونها لشي هي ماسوته لشي لاهو حرام ولا عيب انه اهلها ماتوا هذا اللي الله قدره ,لكن من يفهم؟؟؟ قل الاحساس بالامان صارت خايفه طول الوقت ... لين ملكت شي تخاف تفقده تخاف من بكره وش ممكن يصير فيها تخاف لما تفكر انا في الحقيقه لحالي بهالدنيا هذولا اهلي ربوني بس.......
أشياء كثيره كانت تخطر لها بس صلتها بربها كانت مقويتها البنت الحين على وشك التخرج من الجامعه أثبتت وجودها بنفسها صممت إنها بتوري كل اللي قللو ا من قدرها في يوم هي وش ممكن تقدر تسوي, البنت ترددت كم مره على العياده ميدي كير وكثير كانوا متفهمين وضعها وارتاحت كثير والحمدلله بس الثقه بالنفس شلون ترجع؟؟؟ تحس دايم بالدونيه تستكثر على نفسها كل شي لدرجة ممكن تقول انا من بيرضى يتزوجني في يوم من الايام مع انها انسانه رائعه قريبه من الله حيل كل شي فيها كامل والكامل وجه الله بس من جوا تحتاج أحد يوقف جنبها ثقتها لنفسها لازم ترجع عزمها ولله الحمد كثير قوي بس سوت كثير وقاومت كثير احراجات وكلام بايخ ونظرة شفقه وكثير ماينقال..
تروح لميييين ولوييييييييييييييييين ابي رايكم ؟؟؟؟

المصدر: نفساني

السلام عليكم ورحمة الله وبركاته.....
أختي الفاضلة المتعارف عليه فعلا ً ان بعض الناس ممن شاء الله عليهم باليتم تظهر لديهم اعراض واضحة لضعف الثقة بالنفس فيكون بذلك متحسسين كثيراً لنظرة الناس لهم ويعتقدون انهم اقل من الا خرين مما يسبب لهم توتر وحزن وعدم راحة وقد تشتد تلك الا عراض وتصبح مزعجة حقاً تحتاج التدخل العلاجي وذلك عندما يكون هذا الشخص فى بيئة تساهم فى تعزيز ذلك.... أو يكون لديه صعوبة ما فى شخصيته.... صديقتك طالما بدات العلاج النفسي فلتكمله وذلك الافضل ..... وياليتك تقفي معها وذكريها ان الرسول صلى الله عليه وسلم كان يتماً وهذه من حكمة الله لنعتبر ونتعظ......وفقك الله



استودعكم الله الذي لاتضيع ودائعه