ماعندي عنوان

ماعندي عنوان

السلام عليكم...انا سعيدة بانضمامي معكم المنتدى حلو ويشرف وحابه اعرض مشكلتي وياليت تلاقولي حل وبتمنى بتمنى بتمنى ماحد يقول روحي عند طبيب نفسي لانو هذا الشي مستحيل ياليت ماتصعبوا علي وتكتبولي الحل هنا واذا كان لازم ازور طبيب اكتبولي حالتك مستعصية ومالها علاج! وعذرا على اسلوب الشرح

انا طفولتي كانت جدا جدا جدا جدا هادية لدرجة كنت لو قعدت بمكان تجي ماما بعد ساعات وتلقاني بنفس المكان ماتحركت
وكنت خجوله جدا اهلي كانو يسألوني كيفك وماكنت ارد عليهم ما كنت اتكلم ابدا لا مع الناس ولا مع صحباتي حتى ماما واخواتي ما كنت اتكلم معاهم كتير اما بابا فما كنت اكلمه نهائيا رغم انه طيب واخواتي بيتكلموا معاه عادي بس ما عندي فكره ليش كنت اتجنبه
وانا صغيره كنت اشوف مع البنات في المدرسه اشياء حلوه وتعجبني اقلام تلوين برايات وكنت احلم انو يكون عندي زيها وافكر فيها كثير بس ماكنت اطلب ولا اقول لاحد
المصيبة كنت انزل مع ماما السوق واشوف الشي اللي احلم فيه وابغاه ولما ماما تقولي عجبك شي اقول لا!!!
ماحد كان يضربني ولا يخاصمني اصلا كنت هاديه بشكل فظيع وماكنت اسوي شقاوة حتى اتعاقب كنت بكمه زي ما ماما كانت تعايرني بس والله ما تنلام كنت بنت غريبة الاطوار
في المرحله الابتدائيه كان عندي صحبات كثير بالرغم اني ما اتكلم معاهم بس كانوا يصادقوني عشان بنت ابله!!!
بدأت افقد صدقاتي وانا بالصف الاول المتوسط لما تركت المدرسه الابتدائية وتركت ماما هناك وماعاد صرت بنت ابله فصرت اقعد لحالي وبحس بالاهانه انو ماعندي صحبات وكنت اخجل انو اخواتي اللي معي بالمدرسه يشوفوني قاعده لحالي فصرت ارمي نفسي على البنات وبحس بالاهانة اكثر
كبرت ودخلت الثانويه وانا على نفس الحاله اروح المناسبات واقعد جنب ماما ولا اتكلم ولا افتح فمي بكلمه حتى نرجع البيت بس كنت بجاوب لو احد سألني كيفك كيف المدرسه بأي صف تدرسي وهذا يعتبر انجاز بالنسبه لي
انا حاليا في الجامعه وقبل خمسه شهور كان في بيت خالي حفله صغيره ومارحت مع ماما ولما رجعت سألتها احد سأل عني يعني زي ما بيعملوا مع بنات خالي ومع بنات العيله لما وحده منهم تغيب الكل يسأل عنها ويتصل فيها بس فاجئتني ماما وقالتلي لا مااحد سأل عنك؟ انجرحت كثيرررررر وحسيت من هدوئي الزايد صار ماحد يحس بوجودي وبكيت كثير يومها وقررت اتغير فصرت احاول اتكلم بس بحس بالخجل وبحمر وبعرق وبتلخبط
الخجل مش من الكلام نفسه من نظرات الناس لي بيستغربوا ويقولي جوات قلبهم اخيرا نطقت وفي ناس يقولوها بوشي "اول مره نشوفك تتكلمي" كمان الشي المجنني كلامي بايخ وتعليقاتي سخيفه زي طفل صغير مثلا بيجيبوا سيرة خياطه او كوافيره شاطره ويتكلموا عنها خياطها حلو مكياجها حلو وعشان حابه اشاركهم بقول جنب المشغل كانت تسكن صاحبتي بيطالعوا باستحقار وبيهزوا روسهم كأنهم بيقولوا يعني شو نعمل؟ كلامي زي طفل صغيرررر
انا عنجد حابه اتغير حابه اتكلم واضحك وفرفش بس عشت عمري كله ساكته ماعندي شي اقوله حتى لما اقعد مع صحباتي بسألهم كيفكم وكم كلمه وبعدين اسكت ماعندي شي اقوله ابدا
مره كنت قاعده مع صحباتي بنهاية الدوام وشوي شوي كل بنت تجي سيارتها تروح لبيتها حتى بقيت انا وبنت تانيه اخر شي حاولت انو اتكلم معها وصرت اعلق عن هذا وهذا وهذا واتكلم عن موضوع وبنط على موضوع ثاني وبنط على موضوع ثالث "طبعا الموضوع عندي جمله ولا جملتين" وهي ما نطقت بحرف معي رغم انو صوتها قبل شوي كان يرج الجامعه كلها .. فجأه وانا اتكلم طلعت البنت جوالها من شنطتها وكلمت صحباتها وتقولها كلهم راحوا وتركوني لحالي... انا تضايقت يعني انا مش ماليه عينها كتمت العبره كنت راح ابكي قدام العالم قهرتني حاولت اتكلم كنت بكافح ادور على المواضيع حتى ما تزهق واخرتها ما عبرتي ولا عبرت وجودي
انا ماعندي رهاب اجتماعي بس ماااعندي شي اقوله قريت كتاب "ماذا تسأل عندما لا تعرف ماذا تقول" بس ما فادني ياليت تساعدوني وانا كثير حزنانه على نفسي وعلى طفولتي ما انبسطت وما عندي ذكريات حلوه
على فكره عمري 20 سنه اصغر اخواتي

المصدر: نفساني