المشاركة الأصلية كتبت بواسطة قطرات الندا

يالله حي عيالي ابو نجلا والبدراني
ابشركم اليوم سقت من الدمام للخبر والعكس بس ربشتني ام صديقتي راكبه جمبي قلت لها خالتي ترى بوقف بالهايوي وانزلك ومن عقب كلمتي مسكينه مانطقت ولا حرف قمت وديتها سوق الخضره واستانست مابقى لومي ولا بقدونس بالسوق ظفتهم كلهم .
ابو نجلا تدري وش اتمنى لك ؟ انك تلقى لك صحبه مختلفه تماما عن اللي تعودت عليهم وتلقى وظيفه راتبها ٥٠ الف وعقبها تدور لك بنية حلال وتعرس وتنسى ابوك واوجاعك كلها تعيش مع بزرانك وتواصل ابوك وتتقفل صفحة الماضي .. هالشي لو يتحقق بتنسى الاضطراب الوجداني وتنسى كل همومك .. الله يبلغك ويرزقك اجمل اقدار يارب .
البدراني حساسيتك من اهم اسباب المك وحزنك ولاحظت ان مالك اصحاب ليه ماتفتح محل سعنون تعرض فيه المسابيح ؟ منها تشوف الناس وتطلع من الجلوس والتفكير بحزنك ومنها تتسلى ومنها مكسب مادي ؟ هذا مجرد اقتراح وطبعا انت ادرى بظروفك وقدراتك .
بنصحك نصيحة ام : الدنيا مو واحد زايد واحد يساوي ثنين ولو ما وفى لك شخص او شخصين او عشرين شخص ماتوقف الدنيا .زمان كنت احضر دورات بتطوير الذات وحضرت دوره مهمه بعنوان قانون التعلق وهو التعلق بالاشياء او الاشخاص وانك تشعر ان هالاشياء او الاشخاص هم السعاده وبدونهم توقف الحياه واستفدت كثير كثير كثير من هالدوره لأني استرجعت حياتي لقيت ان المعلومه فعلا صحيحه اذا ربطت سعادتي بشي اتعب واذا تعلقت باشخاص يرحلون بدليل كان تعلقي بأمي وابوي الى حد الجنون كنت اخاف عليهم من العطاس اخاف يزكمون .. وش صار ؟ مرضو ثنينهم بنفس السنه و توفو يعني انضربت اقوى ضربه بقلبي لكنها عدت غصب طيب عدت فهمت بعدها الحياه على اصولها وهي انك تحب نفسك اولا وثانيا وثالثا وبعد نفسك يجي بقية البشر وبقية الاشياء .
لاتقولون انانيه وحب الذات لا صدقني ان ماحبيت نفسك محد راح يحبك وان ماحبيت نفسك مادللتها وان مادللتها تضمحل وتضعف وتشيخ وتمرض .
حب نفسك ودللها واهمس لروحك انك تمر برحله صعبه موجعه وقولها اوعدك راح اطلع من عنق الزجاجه بحول الله و قوته ثم تغيير افكاري .
يمكن تقول كلامي انشائي لايودي ولا يجيب لكن صدقني اني نجحت ..الدواء كثير ساعدني بس ما اعتمدت عليه ابدا .
اتمنى لك يامحمد ان الله يغير حالك الى اجمل الاحوال بغمضة عين من حيث لاتحتسب .