أختي المراهقه .. تنجو من محاولة إنتحار

أختي المراهقه .. تنجو من محاولة إنتحار

السلام عليكم ورحمة الله وبركاته



عندي أخت عمرها 15 سنه بصف ثالث متوسط وهي آخر العنقود

حاليا هي بالمستشفى لأنها حاولت تنتحر بكمية تعدت الـ 40 حبه

وكانت مستعده تنكر لولا أن الطبيب أكد أن بمعدتها حبوب لأنها كانت توهمنا أنها مريضه وعندها آلام بالمعده والظهر وكانت ترفض زيارة الطبيب

قالت انها شربت 7 حبات بندول من غير قصد .. لولا أن حركاتها معروفه قلت لها أنتي قاصده وأصرت أنها كانت مصدعه وتفتكر انها بتتخلص من الألم وشربت 7 حبات وحاولت تقنع الأطباء ..أنا ماصدقتها لأنها كانت تعاني من آلام شديده للغايه .. ولأنها لما تكذب مستعده أنها تسوي أي شي عشان نصدقها
طبعاً مش خوف من الأجراءات الأمنيه على العكس لأن حنا حاولنا نلف الموضوع بشكل بسيط

بعد نتيجة التحليل وإظهار الكميات اللي كانت تشربها عملوا تحقيق معانا قلنا أنها مرتاحه بالبيت وماتعاني من أي مشاكل عائليه لأن هذا الصحيح
قالت للشرطه أنها تعاني من مشاكل عائليه بالبيت والمدرسه .. !!!
وانها حاولت بطرق كثيره تنتحر .. وكانت تشرب الحبوب من زمان .. عشان ترتاح وتتخلص من حياتها ..
طبعاً أختي ذكيه لدرجة أنها تقدر تاخذ جرعات ماتموتها .. _ لفت نظر وإثاره -
بدليل أنها مافكرت انها تقطع شريانها أو تشرب مسحوق تنظيف

قالت للدكتور أنها مرتاحه من تصرفها .. وأنها ماغلطت ! _ ماتعترف بأخطائها أبد -

مع أنها مستحيييييل تحتاج شي وماتلاقيه قدامها .. وبأي وقت لما تقول مضايقه من البيت وتبي تطلع نطلع معاها بأي مكان تبيه .. ومقضيه وقتها تليفونات مع صاحباتها وبالنت وبالزيارات

وعلى الرغم من بجاحتها مع الكبير والصغير .. ومدرساتها يشتكون من قلة أحترمها معاهم ..إلا أنها مصره تثبت لهم أنها ضحية ظروف !!
بإختصار أختي ماخذه حقها وزود .. من الكل

أختي هذي من تقريباً سنه وهي تتعرض لحالات إغماء بسبب أنها لما جات من المدرسه شافت سيارات الأطفاء والشرطه بالبيت بسبب حريق ناتج عن مس كهربائي .. يمكن لأنها تفاجئت باللي شافتها أثر عليها .. أعتقد لفتره بس
لأن بالأخير صارت تسوي المشاكل وتحرجنا بتصرفاتها وسلوكها قدام الناس حتى مع الضيوف .. ولما نجي نلومها أو نقسى شوي عليها بالكلام تتعرض لنفس الحاله
.. أحيان تجيها الحاله لما نكون بزواج .. أو عزيمه .. من غير اي انفعال !!

الغريب بالأمر أنها من شهرين بعد ماوصلت لمدرستها بدقايق أتصلت المديره عشان ناخذها بسبب حالة إغماء تعرضت لها لأنها كانت مطوله أظافرها وماتبي تقصهم ولما جبروها سوت اللي سوتها .. بالمدرسه حاولت معها أنها تفيق وتكلمني .. وبعد ساعتين ومن غير شي رجعت لوعيها وقالت تبي تروح البيت بعصبيه معي ومع أمي !!

وحتى بالبيت ماسلمنا من لسانها .. خصوصاً لأنها سمعت المدرسات يتكلمون عنها وعن تصرفاتها وقلة إحترامها .. قالت أمي اللي قالت لهم الكلام .. وظلت تصارخ على أمي لين أرتاحت .. وبالأخير شغلت الأغاني وقعدت ترقض تقول أن عندها حماس وطاقه كبيره!!


بعد هالشي لاحظت انها صارت تستغل هالشي لصالحها لما تغلط .!

أختي ذكيه وتتصرف وتتكلم أكبر من عمرها تتدخل حتى بالأمور الخاصه بحجة إنها تفهم .. حتى أن خالتي - أقرب أنسانه لها - من اسبوع متعرضه لأجهاض إلا انها تسألها أسأله كبيره على عقلها كثير حتى بالأمور الزوجيه تسألها وتقول لها قولي لزوجك
كذ اوكذا ..


بالأخير ألفت نظركم إلى شغله وحيده بصفها

لما كانت صغيره تعرضت لحرق بمويه حاره وحصل تشوه بيدها .. وهالشي مأثر على نفسيتها حيل .. حتى لما قررنا نسوي لها عملية تجميل الدكتور كان قاسي معاها وقال لها أن الورقه لما تحترق ماترجع لطبيعتها مثل يدك بالظبط .. والعمليه ماراح تغير شي كثير من اللي انتي فيه ..
حنا محنا مقصرين معاها دايم نتكلم ونقنعها أن في ناس معاقيه ومحرومين من أشياء كثير .. وهي تقدر تحرك يدها وأن إصابتها عادي قدام ناس كثير وأن الله سبحانه وتعالى يختبرها بهالشي .. تقول لنا .. أنا مش معترضه عادي ولا أخجل من يدي لكن أحب اسوي العمليه وأرتاح أكثر .. وهالشي مايتعبها لهالدرجه

هالموضوع هو اللي وقف التحقيق لما بدو يشكون انها تتعرض لضرب وقسوه بالبيت حسب كلامها أنها تعاني من مشاكل عائليه .. قلت لهم أن هالشي مخليها تعيش بكآبه .. خلتها تفكر بهالشي




الشي اللي خلاني أكتب لكم وأستشيركم ... أن على الرغم من التعب النفسي بالبيت من اللي سوته

أنها مبسوطه بالمستشفى وتسولف وتضحك .. تزعل وتصارخ لما نسألها وش السبب وأنتي مرتاح.. تقول حياتي ومحد يتدخل فيها أنا حره بتصرفاتي .. حتى بآخر جرعه كانت الأوضاع حلوه بالبيت وكانت بزياره عائليه وناويه تزور صديقتها .. يعني من غير سبب

هي ألحين تتوقع أنها بتلاقي دلال ودلع وتدليل أكثر من قبل .. وما أعتقد هالتصرف سليم ..

كيف نتعامل معها بعد هالموقف .. وخصوصاً أن الكل ماسك نفسه ومقهور ولا وده يتكلم أو يقسى عليها بهالفتره بالتحديد .

كيف نتعامل معها كييييف ؟


أتمنى منكم رد سريع الله لايهينكم

مشكورين وجزاكم الله ألف خير

المصدر: نفساني

بسم الله الرحمن الرحيم

عزيزتي كرز

قرأت المشكلة كاملة .. أختك بحاجة إلى زيارة أخصائي أو أخصائية نفسية بأقرب وقت
ولا يمكن حل مشكلتها عن طريق رد أو ردين في المنتدى فالعلاج السلوكي يحتاج لجلسات علاجيه مع الحالة وأسرتها..
كما أتمنى منكِ عدم التحامل عليها ومساعدتها ..

طمنينا بما يحصل معك

أسعدك الله