الى د / الفاضل عبدالله السبيعي (عاجل)

الى د / الفاضل عبدالله السبيعي (عاجل)

بسم الله الرحمن الرحيم
د الفاضل عبدالله السبيعي اولا* احبك في الله ثانيا* اتمنى ان يتسع صدرك لقضيتي علما بان عمري 21 سنة:عندي مشاكل في المعدة والصدر فانا احس بانتفاخ في البطن والصدر كأن جبل جالس على صدري وبطني او كان بطني وصدري بلونة وواحد ينفخ فيها لين تنفجر بصراحة اعجز عن التعبير السليم والوصف الدقيق لما احس به ولكن رحت لطبيب باطني وقلت الي احس فيه وسوى لي تحاليل واشعة وقالي ان فيني قولون عصبي وان هالانتفاخ والضيق الي احس به هو عبارة عن هواء او غازات في المعدة تضغط على الحجاب الحاجز فيضغط على الصدر وللمعلومية سبق وان رحت لثلاث اطباء باطنيين ويقولون مافيه شي قولون وقولون وبعد كذا رحت لطبيب نفسي بحجز من اخ كريم وما اخذ رايي ورحت على امتعاض لاني ما احب اروح لطبيب الا وانا مرتاح له وانا الي اختاره عموما وشرحت له وقال هالانتفاخ الي في البطن يرتفع للصدر صحيح؟؟ قلت له صحيح حسيت انه فاهم وضعي لكن ماارتحت الا اني اتوجه لك واتمنى منك المساعدة وبيان موقع عيادتك لاني يادكتور تعبت وادعو الله اني يشفيني على يدك المؤمنة ويعطيك اجري وثوابي (فمن فرج عن مؤمن كربة فرج الله عنه كربة من كرب يوم القيامة)
اما تاريخي المرضي فباختصار انا اعاني من رهاب اجتماعي ومن موجات اكتئاب (لاسباب) واخاف من ركوب الطائرة والبحر وهكذا ...
علما ان فيه اشياء كثيرة ودي افضفض لك فيها حتى تشخص الحالة لكن ياحبذا لو ازورك في العيادة ( وشرايك)
ولكن الاهم في هذا يادكتور: هل مرت عليك حالات مثل هالحالة ؟ أي الانتفاخ والثقل الي بالبطن والصدر والتعب هذا او ماعندك أي معلومات ويدخل هذا في الطب الباطني؟ علما اني اتعب من ذلك وكاني اركض في ملعب بل اني اذا لعبت ابذل طاقة والنفس يعوضها لكن في حالتي هذي وانا جالس ومرتاح وكلش ومع ذلك تعبان واحس بزيادة بضربات القلب تابعة لهالتعب الي احس به يادكتور عبدالله
انا الي خايف منه وبقوة هو ان علتي في اصلها تراكمات نفسية ادت وتحولت الى امراض عضوية وذلك بسبب فراغ + وسواس قهري ديني+عزوف نوعا ما عن الناس بسبب الرهاب . ....+ كبت نتيجة عدم وجود صحبة صالحة..واحب اقولك اخيرا ان الرهاب الي فيني لاينطبق على اناس كثر فاصدقاي لما اطلع معه عادي مافي شي لكن بالنسبة المناسبات والعزايم او التعرف واقامة علاقات هنا تكمن المشكلة .. يعني مثلا ابضرب لك مثال ولو طولت عليك شوي في زمن مضى كنت ابي ادخل في جلسات حفظ للقران الكريم في مسجد بالنسبة للطلاب الجامعيين الا اني يوم وصلت واشوف الامام جالس في اخر المسجد و معه ناس ويسولفون وهم طبعا يبيحفظون يعني مسوين جلسة صغيرة في هالحالة انا في معركة مع نفسي ودي اخطو لهم وادخل معهم بس كلما نويت اقوم زادت ضربات قلبي وجاني ضيقة صدر وهمّ تستثقله الجبال وبعد هذه المعركة النفسية قررت اني اطلع برا المسجد واعود ادراجي الى حيثما كنت فخسرت وخبت علما باني واجهت مثل هالمعوقات وتغلبت عليها بحول الله واعطيك مثال بالنسبة للخوف : فقد كنت اخاف من ركوب الاصنصيرات والان ولله الحمد صار الوضع عادي جدا جدا لكن بالنسبة للطيارة والبحر الوضع صعب جدا جدا..
ارجو الرد سريعا وجزاك الله خير ( هل احتاج لزيارتك؟)..
اخوك في الله / فيصل

المصدر: نفساني

الاخ العزيز فيصل,,,,,,,,,,,,
ذكرت اعراض كثيرة وجميعها قد سببت لك قلق ومعانة (وساوس ,خوف من ركوب الطائرة ,رهاب اجتماعي )
وارى في نهاية استفسارك تسألك عن حاجتك الى زيارة الطبيب؟
ما اراة انك بحاجه الى مراجعه طبيب نفسي وذلك لتقييم حالتك بشكل كامل ومساعدتك على التخلص من هذة المعانة الدائمه باذن الله تعالى .

وفقك الله واعانك .