معلمة روضه بمشكله ..!! بليييز ابي استشارتكم ..

معلمة روضه بمشكله ..!! بليييز ابي استشارتكم ..

السلام عليكم ورحمة الله وبركاته

مرحبا اخواني واخواتي

للأسف انا امر حالياً بمكشلتين مع اطفالي بروضه .. وابي استشارتكم لانكم افهم مني ..!!

أنا معلمه جديده توي متوظفه بروضه ولا عندي خبره كبيره بالاطفال الا فقط بايام التدريب السنه الماضيه
واول مره اتحمل مسؤليات اطفال بنفسي ..

لكني مشكلتي اني الأن ادرس اطفال روضه اعمارهم تتقارب مابين 3 ونص - 4 ونص

والاطفال عددهم قليل ومعقول

( مشكلتي الاولى )


عندي طفل عمره تقريباً 5 سنوات بالمره شقي ويضرب اصحابه ولا يظبط نفسه بالحلقه .. دائماً اذا طلبت منه يجلس جلسه صحيحه مثل اصحابه يبكي ويقول لا
ولا يقدر يتحكم بنفسه دائماً اغراضه مرميه على الارض والجزمه الله يكرمكم من يدخل الفصل وهو راميها ..

وبفترة التعليم مايستوعب الحرف ولا الرقم ولا عنده قدره بالامساك بالقلم اذا اعطيته الكتاب وحاولت معاه نكتب مسك القلم وصار يشخبط على كتابه .. اهم شي عنده الالوان يأخذها ويشخبط بها على كتب اصحابه والطاوله
حاولت معه بكم طريقه شجعته بالكلام وانزل الى مستواه وبالهدايا ولا صار فايده الولد كلما له تكون حالته للأسواء .. عصبت عليه لكن للأسف مانفع ..!!

اول اسبوع كنت تاركته على راحته ماكنت اقوله شي لانه سريع البكاء .. لكن طفح الكيل صرت اعصب عليه شوي وصار يخاف ويسمع كلامي مع اني ماودي ان تكون معاملتي معاه كذا ..
لكن ماادري وش اسوي الولد سوا ضجه كبيره بالفصل لأصحابه يضربهم ويزعجهم وصار يتضايقون منه

وانا اتوقع انه طفل غير طبعي .. يختلف بكثير عن اقارنه .. لاتقولون انه توه طفل صغير
لاني الاحظ ان الاطفال الاصغر منه غير تصرفاته .. أغلبهم يظبطون انفسهم وقادرين على الامساك بالقلم وينفع معاهم التشجيع اما هو للأسف مانفع معاه شيء ..

أنا اتوقع انه يعاني بخلل بعقله لانه دائماً يبكي ولا يستوعب اي كلمه ونطقه مو واضح .. ومشيته غير متزنه وتصرفاته تدل على هالشيء اجتمعت بأمه وانكرت ان طفلها فيها شيء قالت انه مريض لانه ماياكل ونتيجة عدم أكله صار عصبي ..!!

لكن أنا مأقنعني كلامها اجتمعت بالمديره وشرحت لها حالة الطفل ان مكانه مو هنا مكانه بمركز متخصص بحالته .. وكلمت المديره امه ..
وردت امه بعصبيه ان طفلي الحمدالله حالته افضل من غيره بكثير .. وهي دخلته بهذي المدرسه لان عدد الاطفال قليل .. وفهمته اني خلاااص ماقدر اعلمه الكتابه لانه للاسف موراضي مره يستوعب بس يشخبط ويحوس على اصحابه
فاالام وافقت قالت مايهم يتعلم اهم شيء انه يحتك بالاخرين
أوكي ماقول لايحتك بالاخرين بس مكانه مو هنا صارو الاطفال يكرهونه وماودي انهم ينظرون لصاحبهم هالنظره مع ان الطفل ماله ذنب
أن اكتشفت أن الأم على علم ان طفلها غير طبعي لكنها مو راضيه تعترف ..!!

تكفوون الله يعافيكم اللي عنده خبره او قد مر بهذي الحاله يساعدني الله يعافيكم
يعلمني كيف اتعامل معها .. هل صحيح مكانه معنا صحييح اولا ..


( مشكلتي الثانيه )

عندي طفله عمرها 6 سنوات ونص بالمرره تضرب اصحابها ولا تقدر تنطق الكلام حتى اذا تكلمت ماتنفهم منها اي كلمه .. البنت ماتقدر تستوعب ولاتركز باي شيء

مثلاً .. مره بفترة الوجبه كان معها فلوس ولابسه شنطتها انا طلبت منها ترجع الشنطه مكانه وتاخذ الفلوس فقط ..

وبعد مانزلت تشتري تسالها البائعه عن الفلوس تقول مادري وينهم رجعت لي بالفصل وقالت (معلمه فلوس )انا طبعاً مافهمت منها ولا كلمه ورحت للمقصف وفهمتني السالفه ورجعت للبنت وقلت له وين حطيت الفلوس اللي معاك مافهمت بس تقول هااه ورحت للشنطته ومريوله ادور على فلوسها ولا لقيتهم من جد انقهرت ماتوقعت ان البنت لللأسف تكون بهذي الحاله ..

وبفترة التعليم ماتقدر تركز معاي واذا طلبت منها تكتب ماتقدر تمسك القلم بس ترسم خطوط صغيره لاي حرف ولا اي رقم او دوائر اتوقع اللي فاهميني بمشاكل الاطفال راح يعرفون هي وش تقصد ..

بالاول كانت مره حالتها سيئه لكن بعد التشجيع صارت احس الحمدالله
لكن مشكلتها الان بالنطق وعدم القدره على الامساك بالقلم وضرب اصحابها

أمها عصبت بعد ماعرفت ان بنتها روضه تقول ان عمرها حوالي 7
لكن المديره فهمتها ان البنت ماتقدر تستوعب شيء
انا اتوقع ان عقلها اصغر من عمرها لان تصرفاتها مثل تصرفات اطفال الروضه واكثر بعد وفيها شيء غير النطق بس الام مصره ان مشكلة بنتها بس التأخر بالكلام .. مع اني اشوف ان البنت موقادره تنطق صح كلش

الحين الله يعافيكم ساعدووني بهذي المشكلتيين من جد نفسيتي تغيرت بعد ماتوظفت ماتوقعت اني امر بهذي الحالات

صحيح ان الاطفال مالهم ذنب لكن المشكله ان الاهل مو راضين يعترفون بمرض اطفالهم

الله يجزاكم خير ويوسع عليكم دنياا واخره ساعدوني بحل منطقي معهم :)

المصدر: نفساني

up

.












.







.

الى أختي : الجادل ...

تحية طيبة ...........

بالنسبة للمشكلة الاولى :

بالنسبة لما ذكرت من أعراض فأنها متصلة الى حد ما باضطراب " فرط النشاط والحركة " Attention-Deficit Hyperactivity Disorder. ADHD

حيث يتميز هاؤلا الاطفال بالحركة الزائده بحيث لا يستطيعون الجلوس ولو لفترة بسيطة دون حركة , كما يصعب عليه الانسجام والانتظام مع الاخرين .

كما يسهل تشتت انتباههم لأي مثير ولو كان هذا المثير بسيط كما انه يظهر انهم لا يسمعون حينما نخاطبهم .

يسرح كثيرا , لا يطبق التعليملت ويفشل في أنهاء العمل المطلوب منه اذا كان هذا العمل يحتاج الى تركيز . ينسى كثيرا .

يجب التأكد أكثر من خلال عرض الطفل على متخصصين بالطب النفسي للاطفال .

الغالب أن مثل هاؤلا الاطفال يتحسنون مع تقدمهم بالعمر أي عند سن المتوسط تقريبا لكن المشكلة أن مرحلة الطفولة مرحلة نمو يتعلم الطفل الكثير من المهارات الاجتماعية والفردية والاكاديمية ومثل هذه الاعراض تعيق تعلم مثل هذه المهارات .

قد لا يحتاج الطفل الى نقله لفصل خاص أو مدرسه خاصة , فأن هناك بعض الاطفال تتحسن حالتهم بعد تناول أدوية معينه تساعد على أن تبقيهم هادئيين أثناء اليوم الدراسي وبهذا يكونون قد أستوعبو ما أخذوه بالمدرسة .

مرة آخرى يجب التأكد من صحة هذه الاعراض بعرضه على متخصصين حتى يتم تشخيصه بشكل صحيح .



بالنسبة للمشكلة الثانية :

أعتقد أن طفلة بعمر 7 سنوات تعتبر كبيره على مرحلة الروضه , اذا كان هناك أخصائية نفسية بنفس الروضة تستطيع عمل مقياس للذكاء لهذه الطفلة للتأكد من أن هذه الطفلة ليس لديها تخلف عقلي .
أو ان يتم تحويلها لمراكز متخصصه لتقييم حالتها .
ان أستمرار الطفلة اذا كان لديها تخلف عقلي أو أعاقة من نوع ما مع العاديين يشعرها بالأحباط فهي ترى زميلاتها يتقدمون وهي عاجزة عن مجاراتهم .

قد تجدون صعوبة في أقناع الاهل بوجهة النظر هذه لكن تأكدوا أن هذا في صالح الطفلة .


أتمنى لك التوفيق والنجاح .........................