الى أ.د السبيعي......مع التحية

الى أ.د السبيعي......مع التحية

السلام عليكم ورحمة الله وبركاته....... تحية طيبة اليك سعادة الدكتور عبدالله السبيعي, ابعث لك بمشكلتي والتي لم اعاني منها الا من شهر تقريباً وحاولت اني احصل على ايميلك الخاص بس ما قدرت, وما لقيت قدامي الا هالطريقة لارسال مشكلتي..... ولثقتي الكبيرة بك واعجابي بشخصيتك( اسفة على الجرأة) اخترت ان ابعث برسالتي ومشكلتي هذه اليك انت بالذات..... واذا سمحت ابغى اتكلم بالعامية اريح لي وعشان تكون الصورة واضحة اكثر عندك.....
انا اول مرة احس اني بمشكلة وابغى اشكيها لأحد لكن خفت اتكلم مع اهلي(امي واخواتي) يزيدوني ملامة اكثر, والصديقة ما حبيت اشكي لها,,,, وما كنت اؤمن بالمشاكل النفسية اللي دايم اسمعها من المتصلين على البرامج اللي حضرتك يادكتور بعض الزملاء تكونون ضيوف فيها ولا عمري فكرت اجلس امام حلقة كاملة من هالبرامج؟,,, لكن هذا اللي صار؟
انا بنت عمري ببداية ال25 سنة ماتزوجت على قدر من الجاذبية والتميز بالشكل والشخصية بشهادة اغلب الناس,, وهذي مشكلتي, كنت انخطب من يوم عمري 16 سنة طبعاً بهالسن كنت صغيرة وما فكرت بالزواج ابد, بالعكس كنت اتعجب لنفسي واضحك واتخيل كيف ممكن اكون ربة بيت بأحلى عمر, ومن هذيك السنة وانا يجيني عريس ورا الثاني, و كنت يا أني انا اطلع علة بالعريس او انه يكون فعلاً غير مناسب, اما ما معاه شهادةجامعية وهذا الموضوع مهم عند اهلي قبل ما يكون مهم عندي, او حكاية انه ما هو شيخ,او مطلق وعنده ابن او بنت مع انه مبسوط مادياً, وقبل هذا كله كنت ادلع نفسي, يعني كنت ابي رجّال غير,يعني كنت اتشرط شوي, مع انه تقدم لي شخص كامل من حيث الاصل والوظيفة والعمر وكان العمر بعد مهم عندي, لأني كنت ابغى واحد اكبر مني بعشر سنوات على الأقل,,,, وقبل6سنوات تقدم لي شاب من ابناء العايلة وكان لسّا متخرج من كلية عسكرية وكان مابيني وبينه الا3سنوات,,, وكأي ضابط ببداية التخرج كان بالقرى والحدود وقال انه غير مستعجل,, لأنه ما استقر بعد,,,,لكن كنت ايامها مندمجة مع احلامي ولا اتنازل لهذا الزواج, كنت ابغى اسكن بمدينة,لأني انا ساكنة بجدة, وابغى شخص كبير بالعمر شوي, وكنت ابغى شخص مبسوط مادياً,,,,, ومرت سنين عمري وانا ما حسيت فيها, الى ما اتزوجو معظم البنات اللي بسني واصغر مني بعد وهم اقل مني بالجمال,وكانت وحدة من صديقاتي تشكي لي من انها ما انخطبت وكل اللي بسنها من بنات عيلتها وجيرانها تزوجوا ما عدا هي, وكان كلامها ما يهمني وبالعكس, كنت اتضايق اذا زودت الكلام بهالموضوع, واشوف انه شي ما يستاهل الشكوىلأني ماني حاسة باللي هي حاسة فيه, ومع كثر كلامها بهالموضوع ومن كثر ما تردد انه اعمارنا كبرت وحنا ما تزوجنا انتبهت من غفلتي اللي كانت سبب تدهوري وردي للعرسان واحد ورا الثاني,,,,, بس مع ذلك كنت ما اشكي لها,, لأني عارفة انها بتلومني,,,, والأهم من كذا اني ما احب اكون بهالمستوى من البنات اللي يتمنون الزواج,,,, مدري ليش؟ كنت اشوف البنات بالكلية اللي اقل مني جمال او بالأصح قبيحات شوي, وكيف يتمنون الزواج وارحمهم واتعجب منهم؟ اختي الكبيرة كانت تلومني دايم وتقول لي اني تبغين عريس مفصّل تفصيل, واذا تمنيت اطلع اتمشى او اروح مكان تقول لي لو انك متزوجة من فلان اوفلان( وتذكر اسماء بعض العرسان اللي وافقوا اهلي عليهم واي بنت تتمناهم)كان رحتي معاه اي مكان بالدنيا تبغينه, وكانت تقول لي الوحدة لما تتزوج لو تروح الصحراء مع زوجها تكون عندها احلى طلعة بالعالم دام انها مبسوطة معاه,,,, وكنت ما اهتم بكلامها وانزعج احياناً من الحاحها علي بهالموضوع وكيف اني ضيعت على نفسي فرص اي بنت تتمناها,,,, وكنت اقول لها ابغى واحد زي زوجك او بمستواه الثقافي والاجتماعي والعملي,,,لأنها هي متزوجة من طبيب من العيلة وهو الوحيد اللي بهالمهنة بالعيلةمع انه مستواه المادي عادي بالأصل, وهو ماشالله بدا يشتهر ويصير معروف على مستوى الرياض بشكل شبه كامل وعلى مستوى المملكة وذلك لأهمية تخصصه, وكانت تقول لي اذا ظليتي كذا بتجلسين من غير زواج,
وبداية السنة هذي سمعت من الاقارب ان الضابط اللي تقدم لي واللي هو من اولاد العايلة سكن بجدة وهو متزوج من سنة بس,,, وما كنت مهتمة ذاك الوقت انه تزوج,,,,واهلي راحوا وحضروا زواجه, اما انا ماكنت اهتم وا حب اروح لبعض المناسبات اللي تقام في ديرتنا الاصلية (تقدر تقول ما تعجبني) المهم, بعد ما جا وسكن جدة عزمه ابوي على الغداء وجا للعزيمة,,,,,,,,,,,,,,,,,,,,,,
وهنا كانت المشكلة,,,,, جاني فضول اني اشوف شكل الولدلأن وحدة مرة قالت لي ان اخته اللي اصغر منه تمدح بجماله مرة,,, ومن باب الفضول قلت باشوف هالولد اللي فرحانين بجماله وشفته من قزاز الشباك العاكس, وياليتني ما شفته؟ بالبداية ما اهتميت وقلت ما اشوف زود جمال, بس انه جداً مملوح وبشوش وابيض,,,,,, هذا كان تعليقي بيني وبين نفسي بس ,,,,,واهتميت ذاك اليوم اني اقدم سفرة حلوة وبالفعل,,,,حتى ابوي لاحظ ان السفرة فيها اهتمام غير عن اهتمام كل مرة,,,,, ولمّا جا المغرب جلسنا كلنا انا واهلي وصار ابوي يمدح بالولد مرة , حتى اخواني مرة اعجبوا فيه وببشاشته واهتمامه بمظهره,وكان بعد من قبل هالمرة شافه ابوي واعجب فيه ومدحه لكن كنت مو مهتمة,,,,, لكن هالمرة بالفعل تندمت اشد الندم على اني ما وافقت عليه ومن اخذ؟ وحدة من بنات القرية اللي اهله ساكنين فيها يعني انا احسن منها بكل شي,,,, طبعاًَ الولد فيه كل المواصفات اللي تتمناها اي بنت, الولد جداً طيب وكان بأمكاني اني اسعده ونكون انا وياه اسعد اثنين بالعالم,,,خاصة واني الحمد لله عندي اسلوب حلو ومميز بعدبالكلام,بالاضافة لمواصفاتي الاخرى؟وانا مؤمنة بأن الرجل هو الآمر الناهي ببيته وكنت اعاهد نفسي دايم بأني اكون مطيعة للرجال اللي راح اعيش معاه مهما كان,لأني بالأخير لو ماسويت كذا انا الخسرانة,,,,,,,,و لأني اكتشقت متأخر مرة ان الفلوس ما تضمن لي حياة سعيدة ومستمرة بعد الزواج..... وبنات عايلتنا كلهم يتمنون ابن العيلة لأنه ما يخفاك انه مافي زيه بأنه يحافظ على البنت اكثر من غيره,,,, وهذا انا ندمانة اشد الندم.. تخيل يادكتور اني صرت ابكي بكا بسريري من القهر والحسرة,,,,وكيف ضيعت عمري من غير ما احس,,,,, مادري ايش كنت ابغى احسن من كذا؟ وكل ما تضايقت ولا تمنيت الطلعة والتمشية ما اتمنى غيره؟ كرهت كل الرجال اللي كنت اتمناهم وصرت ما اتمنى غيره,,,,, لدرجة ممكن تتخيل معها اني ابالغ او ماني طبيعية, صرت اتمنى انه يطلق زوجته حتى اني شفت بالمنانم كذا وأنا اللي ما عمري تمنيت لغيري اي شي لاخير ولاشر؟حسيت وقتها اني وصلت لدرجة واطية من الاخلاق مع ان هذا كله بيني وبين نفسي وا قلت لأحد عليه ابداً,,,,,همي يزيد خصوصاً بعد ما استوعبت ان عمري صار 25 يعني ماني صغيرة,,,,,,, هذي مشكلتي مطولة,, ادري اني اخذت من وقتك الكثير لكن ارجو المعذرة منك,,,,,,,,,,, ولأني مؤمنة بأنك راح ترد علي بأي شي,,,,,,,,,,,
شكرا لك............
تحياتي

المصدر: نفساني

أختي نور الليل:
لا أدري ما اقول و لكن بسم الله:
أولاً: أنت لم يفتك القطار و من كتبه الله لك زوجاً لم يأت بعد (تيقني ذلك).
ثانياً: هذا الشاب لم يكتب لك و إلا لكان ما تتمنين من الإرتباط به.
ثالثاً: دعي عنك تلبيس إبليس ولا تحزني على ما فاتك من حظوظ الدنيا و لا تفرحي بما آتك الله (لِكَيْلَا تَأْسَوْا عَلَى مَا فَاتَكُمْ وَلَا تَفْرَحُوا بِمَا آتَاكُمْ وَاللَّهُ لَا يُحِبُّ كُلَّ مُخْتَالٍ فَخُورٍ )
رابعاً: لا شك عندي و الله ان ما أنت فيه من الندم من فعل إبليس. يا أخيتي هل فاتك يشء مقدر لك؟ لا. صدقيني لو أنك وافقت على هذا الشاب أنه لن يكون لك ما دام الله لم يكتب ذلك. أنت لك قدر لم يات بعد فلا تستعجلي.
(وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ ) نعم الله يعلم و أنتم لا تعلمون.

وفقك الله و رعاك و السلام.